🔥🎣幸福山莊。釣魚/蝦場🎣🔥

今次係第二次去 #釣蝦 ，頭45分鐘只係釣得一隻 #大頭蝦 ！之後終於知道竅門，喺10分鐘入面釣多4隻！

不過釣得多唔等於係好事，因為釣完嘅蝦你必須買走！即係越釣得多就越重皮！😂

價錢方面，蝦獲按重量計錢，我地釣咗16隻，啱啱好一斤！一斤=$119

而借竿（包餌及一罐飲品）第一小時/$50、第二小時/$40🤔

聽落$40蚊玩成粒鐘好似好抵喎！原本想玩耐少少，但經我精明嘅頭腦諗一諗⋯假設我地再釣多粒鐘，除咗要俾多$80之外，萬一又釣多斤蝦⋯兩粒鐘埋單分分鐘要四五百！😅

不過依度比較好嘅係，場內有兩個炭爐係俾釣蝦人士即場燒蝦食！

自助形式：洗蝦>串竹韱>加鹽>放上炭爐

雖然都幾貴，但啲大頭蝦又真係幾好食！蝦頭入面仲有好多膏添！

場內仲有任食bbq，燒埋野食嘅話可以用優惠價買套餐添！放假去玩吓都唔錯嘅

-----------------------------

幸福山莊釣魚場 (流浮山)

流浮山天月路輞井圍

-----------------------------

👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻

想睇更多吃喝玩樂資訊？快啲Follow我啦！

FB：stellasheafoodiary

Ig： stellasheaa

Blog：Stella's hea食玩部屋

YouTube : https://www.youtube.com/channel/UCXPATomyWsZumEe4cT4OBEw

Outdark (尖沙咀) - 冰涼燒酒配炸雞！

一個熱辣辣嘅聖誕節，當然無人想過。但如果調返轉，喺炎炎夏日可以你預早感受吓聖誕氣氛呢？咁又唔同講法喇！

餐廳設計得幾有氣氛，暗暗地嘅環境，再配上星星閃燈，感覺都幾浪漫，始終都係聖誕節嘛～點都離唔開「浪漫」依樣野。一間浪漫嘅韓國餐廳，又點會少咗「愛情鎖」依樣咁有代表性嘅裝飾！成件事即刻變得韓國晒！

西瓜燒酒冰 $198

[分數:8/10]

今次主要為依度嘅特色燒酒而嚟！之前少少地試過士多啤梨米酒，感覺唔錯。所以今次嚟個終極啲嘅西瓜燒酒冰！價錢貴多$60蚊，但份量亦會多啲，而且仲會用半個西瓜嚟裝酒！呃like一流！

西瓜燒酒冰 $198

[分數:8/10]

半個西瓜入面已經預先放好咗一大舊碎冰山，之後店員就會幫我地先落雪碧，後落燒酒，然後再將碎冰山篤碎！最後加埋啲西瓜波波落去就完成～因為加咗好多碎冰落去，所以飲落酒味唔會太濃，反而甜度較高。

雙併炸雞 $192

[分數:8/10]

炸雞分咗5種口味，我地揀選咗原味同香蒜蜜糖味。雙併炸雞嘅份量比我地想像中多，因為除咗有兩款口味嘅炸雞之外，仲會配埋薯格、薯角同薯條⋯炸雞入口多香脆，兩款味道當中，我就偏愛後者，食落甜甜地，而且加咗醬汁之後，感覺濕潤啲之餘，味道仲更加有層次添！

芝士豬肋骨 $332

[分數:8/10]

芝士豬肋骨嘅份量同樣十足！足足有成8條肋骨！鐵板上仲有紫菜飯、泡菜、菠蘿、蛋邊同大量嘅芝士！真係好豐富！等我地影完相之後，店員就開始幫我地捲肋骨～首先將啲芝士加熱軟化，之後就可以正式開站捲！你睇吓啲芝士可以拉到幾高！真係好吸引！

芝士豬肋骨 $332

[分數:8/10]

店員用純熟嘅手法將芝士捲上豬肋骨到！捲得又靚又均勻！之後我地自己再捲嘅時候，硬係捲到邊多邊少咁，技術嘅野真係要熟能生巧！佢地嘅芝士都幾有口感，淡淡地帶有芝士香。而豬肋骨就煮得夠腍又入味，辣度適中，如果怕辣嘅話可以捲多少少芝士中和返。順帶一提，芝士拌紫菜飯都好好㗎～

********************************

Outdark (尖沙咀)
⼀尖沙咀厚福街8號H8 17樓

*********************************

以上消費：$ 795

味道：8/10
環境：8.5/10
服務：8/10
衛生：8/10
抵食：7/10

🍻🎉 FeedMeGuru x Indoor Beach Party 🎉🍻

之前去咗 #FeedMeGuru 嘅Indoor Beach #Party 同平時去開嘅活動感覺好唔一樣！可能因為外藉人士比較多，而且又有野食又有得飲啤酒，所以感覺好 #relax 好好 #Feel ！

第一次飲 #hongkongbeer 入口幾重麥芽味，然後係一陣回甘，對我嚟講回甘味都幾勵害吓！

之後有得試埋 #BreadandBeast  嘅 #Burger  同 #PololiHK 嘅 烤雞飯同餐肉（壽司）～前者啲炸蓮藕片真係好好食！送酒一流丫！

-----------------------------

FeedMeGuru Event

-----------------------------

👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻

想睇更多吃喝玩樂資訊？快啲Follow我啦！

FB：stellasheafoodiary

Ig： stellasheaa

Blog：Stella's hea食玩部屋

YouTube : https://www.youtube.com/channel/UCXPATomyWsZumEe4cT4OBEw

🍞🍵「茶木」X「茶包」開幕喇！🍵🍞

恭喜晒「 #茶木 」新line「 #茶包 」開幕！🎉🎉

好開心可以獲邀出席「茶包」Grand #Opening ！可以一次過試晒多種 #手作麵包 ～

白之#貓山皇 真係 #超好食 ！

 #榴槤 味勁濃！入面啲餡又多又均勻，真係啖啖都食到榴槤香！而且麵包本身軟熟得嚟又有口感！真係無敵！💕💕

其他包包啲餡一樣超足料！尤其個抹茶綠盛會，入面除咗有大大粒紅豆之外，仲加埋麻糬添！

對於身為麵包控嘅我嚟講，實在太幸福喇！！😆😆

-----------------------------

茶包 (九龍灣)

九龍灣宏照道38號企業廣場5期Megabox地下4-6號舖

-----------------------------

👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻

想睇更多吃喝玩樂資訊？快啲Follow我啦！

FB：stellasheafoodiary

Ig： stellasheaa

Blog：Stella's hea食玩部屋

YouTube : https://www.youtube.com/channel/UCXPATomyWsZumEe4cT4OBEw

老友麵館 - 值得支持嘅「良心」小店！

長沙灣一向俾人一個舊區嘅感覺，但正正因為咁，好多小店/老舖都雲集喺長沙灣區，大家對依區嘅小店又知幾多呢？

今次想同大家介紹一間位於長沙灣富華廣場地下嘅「老友麵館」。聽個名好明顯喺一個食麵嘅地方，但招牌上面點解會有隻龍蝦？等我帶大家去睇吓啦～！

同一般麵店好唔同，燈光稍為暗啲，而牆身就喺一塊留言板，上面所貼嘅memo紙，就係客人嘅留言字句～近睇啲memo紙嘅造型仲好可愛添！

食物方面，主要分為兩大類，粉麵主食類同特色小食。同一般麵店最大分別係衣度嘅湯底可以揀「龍蝦湯」或「香烤濃雞湯」，而麵食方面就可選天使麵/鳥冬/上海麵/鮮制魚肉麵！小食之中，亦不乏意式龍蝦湯、芝士龍蝦汁西蘭花、脆炸紅菜頭等⋯出面比較少見嘅美食！

飲品方面，有罐裝汽水、韓式飲品、樽裝豆漿及茶類供選擇。而且高枱上放齊晒所有飲品樣本，食客就可以更清楚係邊款飲品～

原個芝士南瓜焗雞 $58

[分數:8.5/10]

分別揀咗兩款嘢食，原個芝士南瓜焗雞首先送到～南瓜仔細細個，賣相好可愛！南瓜蓋下面就係一層帶焦面嘅芝士！用匙羹翻開嘅時候，上面嘅芝士可以拉出長長嘅芝士絲！夠晒吸引！

原個芝士南瓜焗雞 $58

[分數:8.5/10]

南瓜入面有好多雞肉，而且大大件又無骨～南瓜焗得夠腍，好易就刮到啲南瓜肉出黎～最好係佢入面加咗好多忌廉汁，南瓜肉同忌廉汁混合完先再食，令口感唔會太乾，而且仲好香口添～$58蚊真係好抵食！

芝士煙肉牛脷湯麵 $50

[分數:8/10]

湯麵方面就選了廚師精選-「芝士煙肉牛脷」配天使麵，而湯底當然是選龍蝦湯！每碗湯麵都會配有菠菜,粟米粒,炸紅蔥同蛋絲～所以睇落去真係好豐富！芝士,煙肉同牛脷，３樣都係我鐘意食嘅野～

芝士煙肉牛脷湯麵 $50

[分數:8/10]

厚厚嘅芝士配埋煙肉一齊焗，香上加香，極為邪惡！而底下嘅牛脷唔算太厚，入口香軟帶油香，絕對係水準之作！至於龍蝦湯底，雖然顏色上唔係我地平時飲開嗰種橙黃色，但入口鮮甜無比，令人意外！今次落單嘅時候睇唔到原來仲有魚肉麵可以揀！下次一定要試埋先得！

Stella提提你：

- 每日２：３０-６：００下午茶時段會有８折優惠！

- 雖然「老友麵館」只係一間小店，但餐廳支持聘請聾人/弱聽人士，真係好值得支持！

********************************

老友麵館 (長沙灣)
長沙灣昌華街23號富華廣場地下16號舖

*********************************

以上消費：$ 108

味道：8.5/10
環境：7.5/10
服務：9/10
衛生：8/10
抵食：9/10