蔡瀾越南粉-慕名而來

由食家「蔡瀾」開嘅越南粉，單係個名已經吸引到唔少人慕名而來！新店位於中環地段，以為價錢會好貴，但牛肉粉最平$68蚊已有交昜，而且越南粉係免費任加！即係$68蚊包飽！喺中環嚟講都真係幾抵食！

餐廳主打當然係一系列嘅越南粉，可自選不同組合。亦有湯檬、多款小食、沙律、時菜、甜品同飲品供選擇。

特別牛肉湯河粉 $128

［分數：8/10］

特別牛肉湯河，最特別之處就係可以俾你一次過試齊7款自選配料，當中包括：生牛肉、金錢腱、牛腩、牛筋、貝殼牛肉丸、銅錢牛鞭花同牛栢葉。

另外，仲會附上大量香葉俾你自行加入，有九層塔、鵝芥、洋蔥、芽菜等等⋯

生牛肉、金錢腱、牛腩

先講講肉類，每樣有少少，生牛肉比較薄，送上黎時半生熟，啱啱好。金錢腱厚身少少比較有口感。而牛腩都煮得夠腍。

貝殼牛肉丸、牛栢葉

牛丸有兩粒切半，入口爽口彈牙，唔錯。牛栢葉幾爽口，不過切得比較細件。

銅錢牛鞭花、牛筋

銅錢牛鞭花同牛筋切得比較細粒，所以搵咗一陣先搵到，呢兩樣味道會比較淡，牛筋好腍，牛鞭花帶少少韌力。

越南粉

先講講湯底，入口都幾鮮甜，唔算太油，因為鐘意濃味啲，所以自己放咗好多香葉同青檸落去，味道更加豐富。而越南粉係由餐廳自家制作，入口好滑，質感好輕盈，不知不覺就食晒一碗。食完可以再添～會用碗仔裝一碗俾你～澱粉控啱晒！

越式炸春卷 $48

［分數：8/10］

炸春卷即叫即炸熱辣辣，用生菜包著食，減少膩感就啱晒～入面肉絲、粉絲、蘿蔔絲、木耳絲，口感豐富又香口。

紅茶雪糕 $32

［分數：8/10］

雪糕有3種，分別有椰汁、紅茶及榴蓮味，而我就試咗紅茶味，茶味都幾香濃，甜而不膩，值得一試

越南多色冰 $28

［分數：7.5/10］

多色冰非常足料！入面有成5種顏色嘅配料，底下綠色同粉紅色嘅有啲似馬蹄，比較爽口。藍色係類似啫喱嘅粉條，而黃色就係綠豆。椰汁做底，上方仲有刨冰！好抵飲！

********************************

蔡瀾Pho
中環威靈頓街15-25號地舖

*********************************

以上消費：$236

味道：8/10
環境：8/10
服務：8/10
衛生：8/10
抵食：7.5/10

花木日本料理 - 精緻高質日本料理

每次有朋友生日，搵餐廳嘅重任通常都由我嚟承擔！今次俾我搵到一間喺尖咀新開無耐嘅日本料理～係新到一張相都未有！即刻打電話訂位去試下新野～

好好彩～！原來提早訂位會有甜品送！而且新張期間，店員話仲會免費送「前菜3道」添！真係令人期待！

「花木」嘅環境同餐廳名一樣，餐廳主要用咗木色，周圍都有啲綠油油植物做點綴～地方好靚好舒服～因為比較早到餐廳，所以未有太多人，啱晒我地幾個人傾計同慶祝～大概７點令８點就會開始陸續有人。

免費送贈嘅前菜3道！超有驚喜！！完全無諗過送嘅前菜會靚成咁！擺到成個盆景咁！

入面包括有：

-鰹魚酒盜忌廉芝士

-麵豉醬配青瓜

-炸澤蟹

鰹魚酒盜忌廉芝士

［分數：8/10］

前面細細粒係鰹魚酒盜忌廉芝士，忌廉芝士上面放咗鰹魚肝提味，入口唔會太鹹，芝士好香好軟滑～

麵豉醬配青瓜

［分數：8/10］

食完帶鹹香嘅芝士後，食返粒青瓜，感覺零舍清爽～覺得淨係食青瓜有啲單調？其實旁邊伴有一小碗麵豉醬，青瓜配上麵豉醬後唔單止令味道變得更加豐富，更可以特顯到青瓜嘅清甜～

炸澤蟹

［分數：9/10］

雖然店員叫我地要趁熱食，但呢隻蟹仔實在太可愛！其實一開始店員未介紹佢叫「炸澤蟹」嘅時候，我一直以為佢係裝飾品，因為蟹身帶有光澤，真係好似一件陶瓷裝飾！忍唔住拎上手欣賞一番先放入口～蟹鉗蟹腳炸到脆卜卜，蟹身就帶硬脆口感，帶玩味又好食～

「松」刺身（8點刺身）$788

［分數：9/10］

刺身有「松」、「竹」、「梅」，3款選擇，分為8點、6點、4點。

我地所點嘅「松」，分別有以下8款刺身：

北海道海膽、真鯛、平政、深海池魚、大拖羅、牡丹蝦、帆立貝、赤貝

每件刺身表面都帶光澤新鮮非常，當中我最鍾意同欣賞嘅就非大拖羅莫屬！魚脂分佈平均，不帶任何根位，入口即溶，魚脂香而不膩，已經好耐無喺香港食過完全無根嘅大拖羅了！超幸運丫！

北海道海膽、牡丹蝦

除咗大拖羅之外，北海道海膽同牡丹蝦一樣夠晒吸引！海膽甘香鮮甜不帶苦味，牡丹蝦蝦身肥美晶瑩，入口同樣鮮甜，肉質爽滑富彈性，再品嚐一下甘香嘅蝦頭膏，實在完美～

清酒煮蜆$108

［分數：9/10］

清酒煮蜆嘅份量都幾多，蜆肉大大粒，食咁多粒完全唔會有食到有沙粒喺入面，蜆肉好鮮甜，帶淡淡嘅酒香。底下嘅清酒蜆湯，味道同樣鮮甜，食蜆嘅時候，記得連埋少少蜆湯一啖放入口，味道會更加濃郁鮮甜～不得不提嘅係，煮蜆入面仲加入咗爽脆嘅黑木耳，增加口感之餘，仲可以令成道菜變得更加健康！

沖繩豚肉炒苦瓜$108

［分數：8.5/10］

其實我一向都唔鍾意食苦瓜，之前都有食過沖繩苦瓜，喜歡苦瓜嘅人會好鍾意佢嘅「甘」味，但我就真係覺得好苦！不過朋友想食所以就叫咗一碟，起初諗住夾一件試下味就算，但試完之後我竟然會再食！師傅巧妙地用咗雞蛋去包著苦瓜同豚肉，令到入口一刻有嫩滑嘅口感，最神奇係今次嘅沖繩苦瓜食落只係有苦瓜原本嘅味道，但就無咗嗰陣苦澀味！相比之下，豚肉嘅風頭絕對比苦瓜蓋過咗～

牛肋條$388

［分數：7.5/10］

食咗咁多款海鮮，黎翻個紅肉中和下～大大條牛肋條，真係啱晒鍾意食肉嘅我～店方好貼心咁喺上枱前已經張肋條切成一片片，適合多人分享～肋肉近骨位置有少少脂肪，所以食落比較香口，不過下次會要求唔好咁熟，肉質應該會再嫩滑啲～

小倉白玉蕨餅 (原價$98)

［分數：8.5/10］

最後係訂位所送嘅甜品～喺餐牌睇返，原來個甜品係要$98蚊！白玉同蕨餅都係店方自家製，白玉可以配紅豆一齊食，前者口感煙韌，後者紅豆大大粒，亦唔會太甜。蕨餅沾有黃豆粉，黃豆粉好香，口感方面會比白玉腍啲感覺清爽啲，如果可以再送多兩粒就好喇～！

******************************

花木日本料理 (尖沙咀)

尖沙咀天文台道8號3樓2號舖

******************************

以上消費：$1,532

味道：8.5/10

環境：8.5/10
服務：9/10
衛生：9/10
抵食：8/10

Luxury-慶生好地方

同一位鍾意飲酒嘅朋友慶祝生日， 突登搵咗一間唔收開瓶費嘅餐廳，自己帶咗兩支酒去，一紅一白配返唔同食物。順帶一提，餐廳除咗唔收開瓶，仲可以帶埋蛋糕，一樣係免切餅費，所以喺到慶祝生日真係一個唔錯嘅選擇。

餐廳分成３種收費：

３道菜 $380 +10%

4道菜 $430 +10%

5道菜 $480 +10%

而我就揀咗4道菜 $430 ，當中包括：Starter + Soup + Main+ Dessert

香草麵包配自家製牛油

［分數：７.５／１０］

麵包表面烘到脆脆地，入面保持鬆軟。再配有３款牛油，分別有： 原味、蕃茄及黑松露

蕃茄味相對特別，帶微酸。而黑松露牛油就帶有淡淡嘅松露香，但兩者嘅味道未算太過突出。而我自己就會偏向加入返原味牛油。

荷蘭深海小龍蝦配醬油漬三文魚子

［分數：８.５／１０］

Ｌｉｋｅ　ＦＢ就可以即時獲得［荷蘭深海小龍蝦配醬油漬三文魚子］，雖然係免費送贈，但質素實在相當唔錯。

小龍蝦味道鮮甜，肉質帶點爽彈。再配上晶瑩帶鹹鮮嘅醬油漬三文魚子作為點綴，真係一啲都唔馬虎。

西班牙Iberico 48個月黑毛豬火腿

［分數：８.５／１０］

兩款前菜方面分別係48個月黑毛豬火腿&阿拉斯加蟹肉無花果沙律配法式蟹餅。48個月黑毛豬火腿份量不少，表面帶有一層油光，賣相吸引，細嚼下帶有油香，令人回味。

阿拉斯加蟹肉無花果沙律配法式蟹餅

［分數：８／１０］

相比起黑毛豬火腿，阿拉斯加蟹肉無花果沙律的味道相對清新。甜甜的無花果肉配上混入了醋汁的沙律菜，開胃非常。

旁邊的小圓餅其實是法式蟹餅，表面帶微脆，而內裡是一絲絲的蟹肉，再吃一口沙律，可中和了蟹餅的膩感。

法式干邑龍蝦湯

［分數：７／１０］

深橙色的龍蝦湯，質感濃調，味道頗鮮，帶龍蝦殼的味道，應該放了不少材料餚製。不過若能加入少量龍蝦肉增強口感，整體感覺較佳。

黑松露野菌忌廉湯

［分數：６.５／１０］

松露野菌湯內加入了不少野菌碎粒，松露及野菌是有的，但略嫌味道不算濃郁，可能忌廉放多了，所以口感雖然綿滑，但就欠了一份口感。

慢煮和牛面頰配Ｔｈｙｍｅ牛肉汁配忌廉薯蓉、４３ｃ車厘茄

［分數：７／１０］ 

啡啡的牛臉額，賣相的確難以吸引來形容。不過臉額位的肉質比其他部位相對嫩滑，肉質軟腍，部份位置有著入口即溶的感覺，而且含有骨膠原，女士食一流。不得不提的是用作伴碟的薯蓉，加入了忌廉製成，口感綿滑，味道甚香。

芝士雞卷配韓式甜辣汁、時令蔬菜、４３ｃ車厘茄

［分數：８／１０］

不過相比起剛才的和牛面頰，芝士雞卷反而令我更有驚喜，以一層脆脆的雞皮包裹著芝士雞肉，雞肉的肉質嫩滑非常，做到外脆內嫩。而芝士味則可以再濃一點。伴碟的薯蓉同樣美味，兩份主菜的薯蓉都被我們吃光了。

宇治金時拿破崙

［分數：７／１０］

拿破崙底面兩片酥皮同樣鬆脆，中間夾著大量的抹茶忌廉及紅豆。不過我就較為欣賞旁邊的榛子雪糕，雪糕口感滑漏，榛子味香濃，好吃非常！

韓國柚子芝士蛋糕

［分數：６.５／１０］

雖說是柚子芝士蛋糕，但蛋糕口感輕型，柚子較為突出，沒有太多芝士味。而旁邊的士多啤梨雪糕，酸度強烈，雪糕內還帶有士多啤梨果肉，好吃又消膩。

******************************

Luxury (尖沙咀)

尖沙咀柯士甸道114-116號地下

******************************

以上消費：$ 950

味道：7.5/10
環境：7/10
服務：7/10
衛生：7.5/10
抵食：8/10

店方自創。煙韌西米圓

原本打算去 #佐敦 明星食$98蚊片皮鴨，點知8點已經賣晒，行入後街竟然俾我搵到間新開餐廳，$68就有得食！不過當然份量無咁多，其他野食性價比一般，所以有機會先介紹大家！

食完唔多夠飽，轉場食 #糖水 ！佳佳應該大部分人都識㗎喇，但附近原來仲有間新甜品舖！佢都有圓轆轆嘅野食「西米圓」！

本身以為西米皮會好淋身，但原來個口感煙煙韌韌，有芋蓉、綠豆蓉同麥提莎餡可以揀！

我就試咗芋蓉同麥提莎餡，前者甜甜地，帶得到芋香出嚟，後者個口感脆卜卜～任何甜品另加西米圓只係$9蚊～個人建議熱食塊皮嘅煙韌度會keep耐啲，凍食就記得食咗粒丸先～

除咗西米圓，其實仲可以加 #清心丸 ，份量超多，都係+$9蚊，口感一樣煙煙韌韌！加落馬蹄露到啱晒～

-----------------------------

愛甜心甜品 (佐敦)

佐敦吳松街21號地下

-----------------------------

👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻

想睇更多吃喝玩樂資訊？快啲Follow我啦！

FB：stellasheafoodiary

Ig： stellasheaa

Blog：Stella's hea食玩部屋

YouTube : https://www.youtube.com/channel/UCXPATomyWsZumEe4cT4OBEw

玫瑰梳乎班戟x邪惡朱古力

工廈活化，除咗觀塘區做得有聲有色之外，其實位於荔枝角嘅D2 place入面，亦越開越多鋪頭。除咗有好多小店、親子樂園、餐廳之外，商場入邊仲會不定期舉辦小型市集。更突顯到置身喺工廈之中嘅D2 place與別不同。

地下樓層有幾間餐廳，其中一間佔為比較多，環境又比較寧靜嘅就係Holly Brown Coffee！門口仲寫住星期一至五，六點後均有50% Off！不過就唔包飲品同甜品~

Haystack onion Angus Beef Burger $148
［分數：8/10］

先叫兩份主食，漢堡包類都有成九款選擇，當中包括有牛、魚、羊、雞及素菜包。而我就揀咗安格斯洋蔥漢堡，入面有安格斯牛肉漢堡扒、煎蛋、洋蔥、蕃茄、生菜同車打芝士，再配上燒烤醬。另外，旁邊仲有一大堆薯條伴碟！

Haystack onion Angus Beef Burger $148

［分數：8/10］

最吸引人嘅絕對係包面上水啷啷嘅太陽蛋！由於佢嘅洋蔥原來係炸洋蔥圈，再加上厚厚嘅漢堡扒，切起上嚟真係有啲困難。漢堡包面夠鬆脆，漢堡扒唔會煎得太老，入面仲有啲肉汁。再加上切開太陽蛋嘅時候，蛋汁滲入餡料入面，食落去特別香滑！

Margherita $118

［分數：7.5/10］
因為漢堡包已經有大大件漢堡扒，所以薄餅就揀清少少嘅Margherita。唔好睇佢好似剩係得番茄醬同芝士，其實當中已經混入左四種芝士，包括有mozzarella、jack & cheddar、parmesan、feta cheese！真係啱晒鍾意食芝士嘅我，如果餅皮可以再焗得脆身啲就更好喇！

Willy chocolate party $128

［分數：8.5/10］

食完兩款主食之後，終於到甜品啦！呢杯其實都唔知當佢係飲品定甜品好！最底下嘅係凍朱古力，杯邊痴滿左Oreo餅碎，四四方方嘅係chocolate brownie ，而最頂層嘅就係一杯倒轉咗嘅雪糕，雪糕筒邊仲要有埋朱古力脆皮！

Willy chocolate party $128
［分數：8.5/10］

由面食起！朱古力雪糕非常濃郁，朱古力脆筒亦好好食！反而chocolate brownie有少少似蛋糕，但質感口實啲，朱古力味冇想像中咁濃。至於底下嘅野飲，朱古力味亦都好濃，如果三者之中作比較，一定係雪糕嘅朱古力味最濃！不過飲/食半杯已經想投降了！

Rose Cream Butterfly Soufflé Pancake $168
［分數：7/10］
最後仲有一個超靚嘅蝶舞翩翩！其實係一個特大嘅梳乎班戟！粉紅色嘅係玫瑰忌廉，上面仲擺咗幾隻蝴蝶同花花做裝飾。另外亦會配埋一球玫瑰味雪糕。梳乎班戟真係份量十足 ！班戟口感綿軟，但鬆軟度比一般嘅實少少，所以雖然係甜品但都幾飽肚！再加埋上面面嘅忌廉，一次過食太多真係會有啲漏。不過如果配埋個玫瑰雪糕一齊食，可以降低膩感！不過真係建議四個人食應該會更加適合。

******************************

Holly Brown Coffee Roasters (荔枝角)
荔枝角長順街15號D2 Place二期地下1號舖

******************************

以上消費：$472

味道：8/10

環境：8.5/10
服務：8.5/10
衛生：8.5/10
抵食：8/10