🥨快閃好丘貝果🥨

🥨快閃好丘貝果🥨

#麵包控 注意！ #台灣 #好丘貝果 嚟咗香港喇！不過今次係快閃店！要去銅鑼灣citysuper先買到！而且每日限量400個！一共有11款味：

芋頭鹹蛋黃味、桂花紫薯味、柚子鳳梨、橙香煎茶、原味、地瓜乳酪、大蒜乳酪、草莓甜乳酪、雙份起司、不知春、辣椒九層塔香腸

🍩🍩🍩🍩🍩🍩🍩🍩🍩🍩

每日11點開賣！閒日遲咗少少12點先去到，結果得返3款！所以只係試到地瓜乳酪、大蒜乳酪同雙份起司！無晒我最想試嘅芋頭咸蛋黃味！

😭😭😭😭😭😭😭😭😭😭

地瓜乳酪 $32

［分數：7/10］

3個之中最期待呢個！點知食落無乜味⋯入面得好少餡⋯純粹睇落啲色幾靚⋯要好認真咀嚼先感覺到啲地瓜味⋯反而係個貝果本身幾好食，有口感，帶少少韌性，唔會過硬或太嚡。

🍠🍠🍠🍠🍠🍠🍠🍠🍠🍠

大蒜乳酪 $32

［分數：8.5/10］

有驚喜！屬於咸味系列，蒜味好香，但唔會過濃，配埋乳酪兩者味道好夾，所以令兩者味道更加突出，貝果口感好似比其餘兩個煙韌多少少，好食！

😮😮😮😮😮😮😮😮😮😮

雙份起司 $34

［分數：8/10］

雙份起司感覺上會普通啲，佢芝士份量都多，但始終食落好似平時啲芝士包咁，只係包包口感會有啲唔同，味道係幾好嘅，但成$34蚊一個就⋯自己考慮啦！

🧀🧀🧀🧀🧀🧀🧀🧀🧀🧀

📍📍📍📍📍📍📍📍📍📍📍

city’super「台灣風味市集」－好丘貝果快閃店

日子：即日－3/6

時間：早上11點開始

地址： 銅鑼灣勿地臣街1號時代廣場中庭

📍📍📍📍📍📍📍📍📍📍📍

👉🏻想睇更多吃喝玩樂資訊？Follow我啦！

FB：stellasheafoodiary

Ig： stellasheaa

Blog：Stella's hea食玩部屋

YouTube : https://www.youtube.com/channel/UCXPATomyWsZumEe4cT4OBEw

花木日本料理 - 精緻高質日本料理

每次有朋友生日，搵餐廳嘅重任通常都由我嚟承擔！今次俾我搵到一間喺尖咀新開無耐嘅日本料理～係新到一張相都未有！即刻打電話訂位去試下新野～

好好彩～！原來提早訂位會有甜品送！而且新張期間，店員話仲會免費送「前菜3道」添！真係令人期待！

「花木」嘅環境同餐廳名一樣，餐廳主要用咗木色，周圍都有啲綠油油植物做點綴～地方好靚好舒服～因為比較早到餐廳，所以未有太多人，啱晒我地幾個人傾計同慶祝～大概７點令８點就會開始陸續有人。

免費送贈嘅前菜3道！超有驚喜！！完全無諗過送嘅前菜會靚成咁！擺到成個盆景咁！

入面包括有：

-鰹魚酒盜忌廉芝士

-麵豉醬配青瓜

-炸澤蟹

鰹魚酒盜忌廉芝士

［分數：8/10］

前面細細粒係鰹魚酒盜忌廉芝士，忌廉芝士上面放咗鰹魚肝提味，入口唔會太鹹，芝士好香好軟滑～

麵豉醬配青瓜

［分數：8/10］

食完帶鹹香嘅芝士後，食返粒青瓜，感覺零舍清爽～覺得淨係食青瓜有啲單調？其實旁邊伴有一小碗麵豉醬，青瓜配上麵豉醬後唔單止令味道變得更加豐富，更可以特顯到青瓜嘅清甜～

炸澤蟹

［分數：9/10］

雖然店員叫我地要趁熱食，但呢隻蟹仔實在太可愛！其實一開始店員未介紹佢叫「炸澤蟹」嘅時候，我一直以為佢係裝飾品，因為蟹身帶有光澤，真係好似一件陶瓷裝飾！忍唔住拎上手欣賞一番先放入口～蟹鉗蟹腳炸到脆卜卜，蟹身就帶硬脆口感，帶玩味又好食～

「松」刺身（8點刺身）$788

［分數：9/10］

刺身有「松」、「竹」、「梅」，3款選擇，分為8點、6點、4點。

我地所點嘅「松」，分別有以下8款刺身：

北海道海膽、真鯛、平政、深海池魚、大拖羅、牡丹蝦、帆立貝、赤貝

每件刺身表面都帶光澤新鮮非常，當中我最鍾意同欣賞嘅就非大拖羅莫屬！魚脂分佈平均，不帶任何根位，入口即溶，魚脂香而不膩，已經好耐無喺香港食過完全無根嘅大拖羅了！超幸運丫！

北海道海膽、牡丹蝦

除咗大拖羅之外，北海道海膽同牡丹蝦一樣夠晒吸引！海膽甘香鮮甜不帶苦味，牡丹蝦蝦身肥美晶瑩，入口同樣鮮甜，肉質爽滑富彈性，再品嚐一下甘香嘅蝦頭膏，實在完美～

清酒煮蜆$108

［分數：9/10］

清酒煮蜆嘅份量都幾多，蜆肉大大粒，食咁多粒完全唔會有食到有沙粒喺入面，蜆肉好鮮甜，帶淡淡嘅酒香。底下嘅清酒蜆湯，味道同樣鮮甜，食蜆嘅時候，記得連埋少少蜆湯一啖放入口，味道會更加濃郁鮮甜～不得不提嘅係，煮蜆入面仲加入咗爽脆嘅黑木耳，增加口感之餘，仲可以令成道菜變得更加健康！

沖繩豚肉炒苦瓜$108

［分數：8.5/10］

其實我一向都唔鍾意食苦瓜，之前都有食過沖繩苦瓜，喜歡苦瓜嘅人會好鍾意佢嘅「甘」味，但我就真係覺得好苦！不過朋友想食所以就叫咗一碟，起初諗住夾一件試下味就算，但試完之後我竟然會再食！師傅巧妙地用咗雞蛋去包著苦瓜同豚肉，令到入口一刻有嫩滑嘅口感，最神奇係今次嘅沖繩苦瓜食落只係有苦瓜原本嘅味道，但就無咗嗰陣苦澀味！相比之下，豚肉嘅風頭絕對比苦瓜蓋過咗～

牛肋條$388

［分數：7.5/10］

食咗咁多款海鮮，黎翻個紅肉中和下～大大條牛肋條，真係啱晒鍾意食肉嘅我～店方好貼心咁喺上枱前已經張肋條切成一片片，適合多人分享～肋肉近骨位置有少少脂肪，所以食落比較香口，不過下次會要求唔好咁熟，肉質應該會再嫩滑啲～

小倉白玉蕨餅 (原價$98)

［分數：8.5/10］

最後係訂位所送嘅甜品～喺餐牌睇返，原來個甜品係要$98蚊！白玉同蕨餅都係店方自家製，白玉可以配紅豆一齊食，前者口感煙韌，後者紅豆大大粒，亦唔會太甜。蕨餅沾有黃豆粉，黃豆粉好香，口感方面會比白玉腍啲感覺清爽啲，如果可以再送多兩粒就好喇～！

******************************

花木日本料理 (尖沙咀)

尖沙咀天文台道8號3樓2號舖

******************************

以上消費：$1,532

味道：8.5/10

環境：8.5/10
服務：9/10
衛生：9/10
抵食：8/10

玫瑰梳乎班戟x邪惡朱古力

工廈活化，除咗觀塘區做得有聲有色之外，其實位於荔枝角嘅D2 place入面，亦越開越多鋪頭。除咗有好多小店、親子樂園、餐廳之外，商場入邊仲會不定期舉辦小型市集。更突顯到置身喺工廈之中嘅D2 place與別不同。

地下樓層有幾間餐廳，其中一間佔為比較多，環境又比較寧靜嘅就係Holly Brown Coffee！門口仲寫住星期一至五，六點後均有50% Off！不過就唔包飲品同甜品~

Haystack onion Angus Beef Burger $148
［分數：8/10］

先叫兩份主食，漢堡包類都有成九款選擇，當中包括有牛、魚、羊、雞及素菜包。而我就揀咗安格斯洋蔥漢堡，入面有安格斯牛肉漢堡扒、煎蛋、洋蔥、蕃茄、生菜同車打芝士，再配上燒烤醬。另外，旁邊仲有一大堆薯條伴碟！

Haystack onion Angus Beef Burger $148

［分數：8/10］

最吸引人嘅絕對係包面上水啷啷嘅太陽蛋！由於佢嘅洋蔥原來係炸洋蔥圈，再加上厚厚嘅漢堡扒，切起上嚟真係有啲困難。漢堡包面夠鬆脆，漢堡扒唔會煎得太老，入面仲有啲肉汁。再加上切開太陽蛋嘅時候，蛋汁滲入餡料入面，食落去特別香滑！

Margherita $118

［分數：7.5/10］
因為漢堡包已經有大大件漢堡扒，所以薄餅就揀清少少嘅Margherita。唔好睇佢好似剩係得番茄醬同芝士，其實當中已經混入左四種芝士，包括有mozzarella、jack & cheddar、parmesan、feta cheese！真係啱晒鍾意食芝士嘅我，如果餅皮可以再焗得脆身啲就更好喇！

Willy chocolate party $128

［分數：8.5/10］

食完兩款主食之後，終於到甜品啦！呢杯其實都唔知當佢係飲品定甜品好！最底下嘅係凍朱古力，杯邊痴滿左Oreo餅碎，四四方方嘅係chocolate brownie ，而最頂層嘅就係一杯倒轉咗嘅雪糕，雪糕筒邊仲要有埋朱古力脆皮！

Willy chocolate party $128
［分數：8.5/10］

由面食起！朱古力雪糕非常濃郁，朱古力脆筒亦好好食！反而chocolate brownie有少少似蛋糕，但質感口實啲，朱古力味冇想像中咁濃。至於底下嘅野飲，朱古力味亦都好濃，如果三者之中作比較，一定係雪糕嘅朱古力味最濃！不過飲/食半杯已經想投降了！

Rose Cream Butterfly Soufflé Pancake $168
［分數：7/10］
最後仲有一個超靚嘅蝶舞翩翩！其實係一個特大嘅梳乎班戟！粉紅色嘅係玫瑰忌廉，上面仲擺咗幾隻蝴蝶同花花做裝飾。另外亦會配埋一球玫瑰味雪糕。梳乎班戟真係份量十足 ！班戟口感綿軟，但鬆軟度比一般嘅實少少，所以雖然係甜品但都幾飽肚！再加埋上面面嘅忌廉，一次過食太多真係會有啲漏。不過如果配埋個玫瑰雪糕一齊食，可以降低膩感！不過真係建議四個人食應該會更加適合。

******************************

Holly Brown Coffee Roasters (荔枝角)
荔枝角長順街15號D2 Place二期地下1號舖

******************************

以上消費：$472

味道：8/10

環境：8.5/10
服務：8.5/10
衛生：8.5/10
抵食：8/10

🍍真係「菠蘿」包🍍

新年去 #東涌 outlet掃平貨，掃貨前梗係要食啲野先！東涌站外邊 #新開 咗間 @菠蘿仔食堂 記得之前好似做過小食車？

#下午茶 時段 #鮮忌廉菠蘿包 連飲品$33蚊！轉特飲嘅話就半價～我就轉咗 #菠蘿冰 喇！

鮮忌廉菠蘿包 （分數：7/10）

最值得一讚嘅係個菠蘿包面真係好鬆脆！而啲鮮忌廉亦混入咗菠蘿味，算係甜而不漏。但缺點係，其實啲菠蘿本身唔夠甜，份量唔多。而且 #菠蘿 只係放喺中間，上圖係我要打開個包挑出啲，先可以影到咁嘅效果。單叫一個 #菠蘿包 $6蚊， 鮮忌廉菠蘿包就要$23蚊。抵唔抵就真係見仁見智喇。

菠蘿冰 （分數：6/10）

菠蘿冰就真係唔多建議大家叫喇，除非你真係好鍾意食菠蘿！因為成杯野只有一個賣點，就係有成半杯鮮菠蘿！但「冰」只係菠蘿水⋯仲要好淡⋯我諗如果改做梳打/直接倒罐7-up落去會好飲啲！

🥤🥤🥤🥤🥤🥤🥤🥤

-----------------------------

菠蘿仔食堂 (東涌)

東涌港鐵東涌站22號舖

-----------------------------

👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻

想睇更多吃喝玩樂資訊？快啲Follow我啦！

FB：stellasheafoodiary

Ig： stellasheaa

Blog：Stella's hea食玩部屋

YouTube : https://www.youtube.com/channel/UCXPATomyWsZumEe4cT4OBEw

👩🏻‍🍳🌹唐宮小聚開幕活動🌹👩🏻‍🍳

荃灣唐宮小聚開咗喇~好開心即場有星級大廚Jacky Yu 教整玫瑰花包包同流心湯丸~我都整得幾靚㗎~

原來玫瑰花包無我想象中咁難整，只要將5片圓型皮疊好卷埋，再慢慢反啲花瓣就完成～

反而湯圓要皮薄餡靚，薄得黎又唔會爆餡先最難！我有兩粒都衰咗！而且包得好慢！

另外仲即場試咗佢地黑金流沙包同黃金魚皮～流沙包一搣開就爆晒啲流沙出黎！加上黑配金嘅賣相，食落都矜貴過人～黃金魚皮即炸即食真係比食現成包裝嘅好好多！熱辣辣脆卜卜！蛋黃味都濃郁啲～

💃🏼💃🏼💃🏼💃🏼💃🏼💃🏼💃🏼💃🏼

-----------------------------

唐宮小聚 (荃灣)

荃灣楊屋道1號荃新天地1期UG層43及81號舖

-----------------------------

👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻

想睇更多吃喝玩樂資訊？快啲Follow我啦！

FB：stellasheafoodiary

Ig： stellasheaa

Blog：Stella's hea食玩部屋

YouTube : https://www.youtube.com/channel/UCXPATomyWsZumEe4cT4OBEw

Pasta Zone-平食正宗意大利手工意粉

前排葵廣當旺，近排發覺觀塘同將軍澳彈起！所以今次同大家介紹一間喺觀塘工廈嘅一間意大利小店！真係有意大利人坐陣㗎！

小店主打各款手工意粉同雲吞，有幾款真係未曾試過，最重要係每碟只係$68-$75！性價比高！ 抵食

蒜蓉煮青口 $48

[分數：8/10］

份量足，細細粒容易食，多人share就最啱～除咗蒜蓉仲加咗啲意大利臘腸粒提味，所以鮮甜之外，仲帶幾分咸香，令味道變得更加豐富

巴馬火腿配蜜瓜 $38/3件

[分數：7/10］

小食之中最特別嘅一定係巴馬火腿配蜜瓜，整到成隻帆船咁，大大件夠吸引！味道方面，嗰日嘅蜜瓜夠甜夠多汁，唯返$13蚊左右一件，抵食！

手工扭紋粉配車厘茄汁 $68

[分數：8.5/10］

幾款特色意粉入面，我最鍾意嘅就係呢款！個樣有啲似螺絲粉，但食落超有口感，好煙韌！另一方面，因為佢比較幼身，所以又唔會得表面有味！配埋酸酸地嘅車厘茄汁，好醒胃！

貓耳朵配鯷魚橄欖汁 $68

[分數：8.5/10］

貓耳朵反而無想像中咁有咬口，比較薄身，容易入味。但口感會比扭紋粉軟反些少！鯷魚橄欖汁比較少見，個樣有啲似中式啲欖菜，橄欖味都幾濃下，仲有少少鯷魚嘅咸鮮，都幾特別

手工小方型牛肉餡配忌廉汁 $68

[分數：7/10］

呢款我會覺得乾身咗啲，而且雲吞仔細細粒，唔係好感受到佢入面嘅牛肉餡，可能始終偏愛有口感嘅野，雖然佢都入味，但就好似食緊齋意粉咁，所以衣款我一般

手工大方型牛肝菌芝士雲吞 $75

[分數：8.5/10］

大方型個感覺就好好多喇！雖然佢個賣相唔多討好，但味道真係好濃！尤其鍾意牛肝菌味嘅話就啱晒！大大隻嘅雲吞入面同樣包有肉餡，始終大隻啲肉餡多啲，味道點都濃郁啲同有口感啲

蕃茄汁豬肉丸手工麵 $68

[分數：8.5/10］

個樣有啲似平時喺ikea食嘅肉丸，但口感味道完全唔同！肉同麵粉嘅比例完全唔同，依到嘅豬肉丸你會感受到真係有「肉」，而唔係牛丸無牛嘅感覺～意粉同樣係手工製，所以你會見到有啲起角而唔係好圓滑，食落口感同普通意粉唔同架～！

士多啤梨雪糕配黑醋 $28

[分數：9/10］

甜品只有雪糕同咖啡好似無乜特別？其實士多啤梨雪糕本身個味道巳經同一般嘅有好大分別，質感有少少似雪葩，感覺清爽啲，入口酸酸甜甜。不過最特別係會喺雪糕上再加啲黑醋！黑醋配鵝肝肉食就見得多，但估唔到係加落雪糕竟然都好match！好好食！(大家喺屋企試嘅話，記得唔係用點麵包好稀嗰種，係要加傑身好似漿嗰隻，味道香甜好多㗎！)

.

雪糕咖啡 $28

[分數：8/10］

鍾意飯後一杯啡嘅，就可以揀依款雪糕咖啡，espresso做底，再加曲奇雪糕。依個我無試到，聽朋友講加完雪糕無咗espresso嘅苦，但好香咖啡味，飯後甜品連咖啡一杯過都唔錯~

🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹

價錢：💖💖💖💖 味道：💖💖💖💖

賣相：💖💖💖      環境：💖💖💖

（5💖最高）

-----------------------------

Pasta Zone (觀塘)

觀塘開源道60號駱駝漆大廈3期1樓J室

-----------------------------

👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻

想睇更多吃喝玩樂資訊？快啲Follow我啦！

FB：stellasheafoodiary

Ig： stellasheaa

Blog：Stella's hea食玩部屋

YouTube : https://www.youtube.com/channel/UCXPATomyWsZumEe4cT4OBEw