2018年3月13日 星期二

店方自創。煙韌西米圓

原本打算去 #佐敦 明星食$98蚊片皮鴨,點知8點已經賣晒,行入後街竟然俾我搵到間新開餐廳,$68就有得食!不過當然份量無咁多,其他野食性價比一般,所以有機會先介紹大家!
食完唔多夠飽,轉場食 #糖水 !佳佳應該大部分人都識㗎喇,但附近原來仲有間新甜品舖!佢都有圓轆轆嘅野食「西米圓」!

本身以為西米皮會好淋身,但原來個口感煙煙韌韌,有芋蓉、綠豆蓉同麥提莎餡可以揀!
我就試咗芋蓉同麥提莎餡,前者甜甜地,帶得到芋香出嚟,後者個口感脆卜卜~任何甜品另加西米圓只係$9蚊~個人建議熱食塊皮嘅煙韌度會keep耐啲,凍食就記得食咗粒丸先~
除咗西米圓,其實仲可以加 #清心丸 ,份量超多,都係+$9蚊,口感一樣煙煙韌韌!加落馬蹄露到啱晒~


-----------------------------
愛甜心甜品 (佐敦)
佐敦吳松街21號地下
-----------------------------
👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻
想睇更多吃喝玩樂資訊?快啲Follow我啦!
FB:stellasheafoodiary
Ig: stellasheaa
Blog:Stella's hea食玩部屋

2018年2月28日 星期三

玫瑰梳乎班戟x邪惡朱古力

工廈活化,除咗觀塘區做得有聲有色之外,其實位於荔枝角嘅D2 place入面,亦越開越多鋪頭。除咗有好多小店、親子樂園、餐廳之外,商場入邊仲會不定期舉辦小型市集。更突顯到置身喺工廈之中嘅D2 place與別不同。


地下樓層有幾間餐廳,其中一間佔為比較多,環境又比較寧靜嘅就係Holly Brown Coffee!門口仲寫住星期一至五,六點後均有50% Off!不過就唔包飲品同甜品~

Haystack onion Angus Beef Burger $148
[分數:8/10]
先叫兩份主食,漢堡包類都有成九款選擇,當中包括有牛、魚、羊、雞及素菜包。而我就揀咗安格斯洋蔥漢堡,入面有安格斯牛肉漢堡扒、煎蛋、洋蔥、蕃茄、生菜同車打芝士,再配上燒烤醬。另外,旁邊仲有一大堆薯條伴碟!

Haystack onion Angus Beef Burger $148
[分數:8/10]
最吸引人嘅絕對係包面上水啷啷嘅太陽蛋!由於佢嘅洋蔥原來係炸洋蔥圈,再加上厚厚嘅漢堡扒,切起上嚟真係有啲困難。漢堡包面夠鬆脆,漢堡扒唔會煎得太老,入面仲有啲肉汁。再加上切開太陽蛋嘅時候,蛋汁滲入餡料入面,食落去特別香滑!

Margherita $118

[分數:7.5/10]
因為漢堡包已經有大大件漢堡扒,所以薄餅就揀清少少嘅Margherita。唔好睇佢好似剩係得番茄醬同芝士,其實當中已經混入左四種芝士,包括有mozzarella、jack & cheddar、parmesan、feta cheese!真係啱晒鍾意食芝士嘅我,如果餅皮可以再焗得脆身啲就更好喇!


Willy chocolate party $128
[分數:8.5/10]
食完兩款主食之後,終於到甜品啦!呢杯其實都唔知當佢係飲品定甜品好!最底下嘅係凍朱古力,杯邊痴滿左Oreo餅碎,四四方方嘅係chocolate brownie ,而最頂層嘅就係一杯倒轉咗嘅雪糕,雪糕筒邊仲要有埋朱古力脆皮!

Willy chocolate party $128
[分數:8.5/10]
由面食起!朱古力雪糕非常濃郁,朱古力脆筒亦好好食!反而chocolate brownie有少少似蛋糕,但質感口實啲,朱古力味冇想像中咁濃。至於底下嘅野飲,朱古力味亦都好濃,如果三者之中作比較,一定係雪糕嘅朱古力味最濃!不過飲/食半杯已經想投降了!


Rose Cream Butterfly Soufflé Pancake $168
[分數:7/10]

最後仲有一個超靚嘅蝶舞翩翩!其實係一個特大嘅梳乎班戟!粉紅色嘅係玫瑰忌廉,上面仲擺咗幾隻蝴蝶同花花做裝飾。另外亦會配埋一球玫瑰味雪糕。梳乎班戟真係份量十足 !班戟口感綿軟,但鬆軟度比一般嘅實少少,所以雖然係甜品但都幾飽肚!再加埋上面面嘅忌廉,一次過食太多真係會有啲漏。不過如果配埋個玫瑰雪糕一齊食,可以降低膩感!不過真係建議四個人食應該會更加適合。
******************************
Holly Brown Coffee Roasters (荔枝角)
荔枝角長順街15號D2 Place二期地下1號舖
******************************
以上消費:$472
味道:8/10
環境:8.5/10
服務:8.5/10

衛生:8.5/10
抵食:8/10

2018年2月24日 星期六

新年食餐好!壽司藝Omakase!

新年食返餐好嘅!去大坑食餐omakase先!平時好少去依區,附近嘅食店都好似已經變咗唔少~不過其實自己幾鍾意呢種靜中帶旺嘅感覺,只係呢區對我嚟講真係有啲遠~要有時間先可以過嚟行吓!

壽司藝嘅環境同一般嘅有少少唔同,成個環境感覺光猛啲,而且地方大啲,唔只有吧枱位,仲有一間細房喺近門位置!

Omakase主要分為3款,月 $1080、彩 $1280、藝 $1680。「藝」入面包含咗六個類別嘅食品,有前菜、刺身、熱食、壽司、湯品同甜品。

選好後,店員先為我地遞上前菜!
前菜好精緻,有海蝦、海膽豆腐、春筍。當中最特別嘅係海膽豆腐,外表有啲似玉子頭腐,但口感實少少,仲有陣海膽味添!

之後到刺身喇!喺開始前,師傅會喺我哋面前即磨山葵!新鮮山葵嘅味道口感同平時現貨嘅完全唔同,香而不嗆。



左口魚刺身
第一款係左口魚刺身,有兩款食法。一款係將左口魚切成薄片,而裙邊位置就經過火灸!薄片口感比較爽彈,而裙邊位邊就會比較有口感,越咬越香。

粒貝 (海螺)
大大隻海螺即開即食,上面放嘅係新鮮海苔。先印一印檸檬,然後再食!口感爽脆味道鮮甜,再加上少少海苔嘅味道,完全唔覺有腥味!


牡丹蝦
食緊粒貝嘅時候,師傅已經係我地面前拆緊大大隻牡丹蝦!可以邊睇表演邊食!無需多講,牡丹蝦鮮甜無比!至於牡丹蝦頭,師傅會拎俾廚房炸咗佢!炸蝦頭揸得好香脆,可以成個食晒!


深海池魚
拖羅以外,深海池魚係我第二款最鍾意嘅刺身!口感結實得嚟又有啲爽彈,食落帶脂香,但又唔會好似拖羅咁漏,食多幾件都唔怕!



鯖魚
平時都鯖魚其實普普通通,因為鯖魚多數有陣腥味。試咗一啖竟然唔覺有腥味,問一問師傅,原來早排係鯖魚季,所以先會用來做刺身。另外兩件就會用火輕輕燒一燒,令味道更香,更加容易入口!


蟹醋啫喱毛蟹
咁多款刺身入邊最精緻嘅就係呢杯加入左蟹醋啫喱同大量毛蟹肉嘅高杯!紫色一粒粒野係紫蘇花,唔止顏色靚,入口仲會有陣陣香味!師傅已將毛蟹提早拆肉,真係每啖都係心機!再配埋晶瑩剔透嘅蟹醋啫喱,入口即溶,帶微酸及醋香,既相配又清新!



拖羅
終於輪到我最愛嘅拖羅壓軸出場!師傅喺粉嫩嘅拖羅上界上格紋,令拖羅更易做到入口即溶嘅口感,脂香滿溢!
而另一個食法就較為少見,先將拖羅用火輕灸,配埋紫蘇葉,再用紫菜包著一齊食!經燒過嘅拖羅,脂香同樣濃郁,油膩感稍為降低,再加上紫菜同紫蘇葉,令油膩感大大下降。不過對於喜歡脂香味濃嘅我,就會偏向乜都唔加,直接收入口了!

西京燒
食完刺身之後會有一道熱食-「西京燒」即係燒雪魚 。食完咁多凍野之後食返啲熱野感覺舒服。鱈魚燒得啱啱好,肉質嫩滑,魚皮帶微脆,加上皮下嘅一層魚脂,絕對係又香又嫩!


炸泥鰍魚
炸泥鰍魚真係第一次食!師傅仲要喺魚缸即時取出魚仔!再拎入廚房炸!細細條嘅泥鰍魚炸得透切!炸到成條脆卜卜!用嚟送酒一流!


帶子壽司
終於嚟到壽司一環,所有壽司師傅都會先沾上醬油,所以基本上可以即刻放入口!帶子切半後,依然厚厚的,入口當然口感十足,鮮甜非常!

赤睦魚壽司
「赤睦魚」因為之前未食過,所以師傅講咗幾次先聽到個魚名!肉質彈牙帶魚香,味道唔錯。


海膽壽司
睇住師傅開咗盒海膽一層一層疊上去,已經係一種享受!海膽鮮甜完全冇苦味,成件放入口,一啖咬落去所帶嚟嘅爆漿感,繼而係海膽嘅香味充斥著成個口腔,嗰種幸福感實在無法形容!

三文魚籽壽司
食完海膽壽司,再嚟多件爆漿感壽司!就係粒粒一樣咁飽滿嘅三文魚籽!黃色一點點嘅係柚子皮,令成個感覺更加精美。三文魚籽味鮮,鹹度比一般低些少,所以即使一次過放入口,都唔怕味道過鹹!

右口魚壽司
我無寫錯,更唔係左右不分!依款真係叫「右口魚」!經火灸過之後,好清楚可以睇到佢嘅油光!入口唔止香,仲有埋入口即溶嘅感覺!好好食!


拖羅蓉手卷
接近尾聲嘅時候,就有一個小小嘅手卷。師傅係我地面前即時製作拖羅蓉,除咗有拖羅之外,再加入埋黃蘿蔔同蔥粒去增強口感同提味!由於拖羅蓉夠多,即使配上壽司飯同吃,味道都唔會被蓋過!

湯品-魚湯
食甜品前,先飲一個魚湯。魚湯煲到奶白色,湯入面會有一件魚肉同豆腐。又係食完一輪凍野之後,嚟碗熱辣辣嘅魚湯,感覺舒服!

甜品
甜品意外地有驚喜!因為唔止得一球雪糕,仲有埋紅豆、黃豆粉同白玉丸子陪襯,連底下嘅脆餅都食得!比一般omakase 淨係比生果或者一球雪糕作為甜品豐富好多!

******************************
壽司藝 (大坑)
大坑浣紗街九號地下
******************************
以上消費:$1,850/位
味道:8.5/10
環境:8.5/10
服務:8.5/10

衛生:8.5/10
抵食:8/10


🍍真係「菠蘿」包🍍

新年去 #東涌 outlet掃平貨,掃貨前梗係要食啲野先!東涌站外邊 #新開 咗間 @菠蘿仔食堂 記得之前好似做過小食車?



#下午茶 時段 #鮮忌廉菠蘿包 連飲品$33蚊!轉特飲嘅話就半價~我就轉咗 #菠蘿冰 喇!




鮮忌廉菠蘿包 (分數:7/10)
最值得一讚嘅係個菠蘿包面真係好鬆脆!而啲鮮忌廉亦混入咗菠蘿味,算係甜而不漏。但缺點係,其實啲菠蘿本身唔夠甜,份量唔多。而且 #菠蘿 只係放喺中間,上圖係我要打開個包挑出啲,先可以影到咁嘅效果。單叫一個 #菠蘿包 $6蚊, 鮮忌廉菠蘿包就要$23蚊。抵唔抵就真係見仁見智喇。

菠蘿冰 (分數:6/10)
菠蘿冰就真係唔多建議大家叫喇,除非你真係好鍾意食菠蘿!因為成杯野只有一個賣點,就係有成半杯鮮菠蘿!但「冰」只係菠蘿水⋯仲要好淡⋯我諗如果改做梳打/直接倒罐7-up落去會好飲啲!
🥤🥤🥤🥤🥤🥤🥤🥤
-----------------------------
菠蘿仔食堂 (東涌)
東涌港鐵東涌站22號舖
-----------------------------
👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻
想睇更多吃喝玩樂資訊?快啲Follow我啦!
FB:stellasheafoodiary
Ig: stellasheaa
Blog:Stella's hea食玩部屋