2017年9月29日 星期五

泰海鮮-三聖食海鮮果然名不虛傳

成日聽人講,食海鮮一定要入屯門三聖,因為一定比其他地方平靚正!今次終於約齊人可以入去試吓喇!而且有位朋友熟悉行程,幫我地買好晒海鮮,之後拎去小菜館加工!我地只要坐定定等食就得~

加工嘅菜館叫「泰海鮮」,入到村之後會見到一個個帳篷,行入少少就會見到。人多嘅話可以直接訂間房,想同朋友玩得癲啲大聲啲都無問題!


泰皇芝心蝦丸(3粒) $78 

[分數:9.5/10]
等食海鮮之前,我地叫咗個招牌泰皇芝心蝦丸!雖然好多泰國菜館都有芝心蝦丸,但叫得做招牌菜就當然會與眾不同!蝦丸嘅表面痴滿晒麵包粒,麵包粒炸得金黃鬆脆,入面嘅蝦丸口感爽彈,而最中心位置就係流心嘅芝士漿!而且芝士味濃郁!一粒蝦丸集合晒3重口感!激讚!


海鮮湯 每位$18 
[分數:9.5/10]
海鮮湯按人頭收費,每位只需$18蚊就得!餐廳用蕃茄薯仔湯做底,再加埋大量雜魚、瀨尿蝦同沙白蜆落去!唔好睇佢只係十幾蚊,但真係超鮮甜!個湯煲到奶白色,仲會俾埋一大碟湯渣我地~絕對真材實料!


阿拉斯加長腳蟹三食(五斤十一両) $553 @ 辣椒膏炒阿拉斯加長腳蟹身 
[分數:8/10]
嚟到重頭戲!阿拉斯加長腳蟹三食!我地隻蟹重五斤十一両,再由餐廳加工變三食!我地揀咗用辣椒膏炒、清蒸同花雕蛋白蒸~最先嚟到嘅係辣椒膏炒阿拉斯加長腳蟹身!原本睇見佢紅噹噹以為會好辣,但食落幾乎唔辣,仲帶少少甜味添!由於用辣椒膏炒嘅係蟹身連腳位,要慢慢食先食到,真係啖啖都咁惹味!

阿拉斯加長腳蟹三食 @ 清蒸阿拉斯加長腳蟹蟹腳
[分數:8.5/10]
第二食係清蒸阿拉斯加長腳蟹蟹腳!無需多加解釋,又粗又長的阿拉斯加長蟹腳,無需加入任何配料或調味,已經非常鮮味!剪開蟹腳拎出蟹肉,啖啖肉嘅口感真係不得了!簡簡單單已經足夠!



阿拉斯加長腳蟹三食 @ 花雕蛋白蒸阿拉斯加長腳蟹蓋

[分數:9/10]
第三食係花雕蛋白蒸阿拉斯加長腳蟹蓋!平時都唔覺阿拉斯加蟹嘅蟹蓋係有咁多蟹膏!入口甘香,送飯一流!花雕蛋白唔止淨係得蟹蓋入面有,蟹蓋底都有好多!蛋白夠香滑,入口有陣花雕香,所以不論係蟹蓋定伴碟嘅蛋白,全部都俾我地食曬!


黃金鮮魷 $138

[分數:8/10]

近排興「黃金」,所以我地都叫咗碟黃金鮮魷!金黃色嘅外表真係好吸引!而且離遠都已經聞到佢嘅香味,表外好鬆化,而且油份唔多,食多幾件都唔會覺得太漏!入口鹹蛋味好濃!另外,入面嘅鮮魷好易就咬得開,唔會令人一咬就碎開晒,又係一道罪疚感爆燈而又感點爆登嘅邪惡小食!

白酒忌廉煮刀貝 $128

[分數:9/10]
不得不提嘅仲有白酒忌廉煮刀貝!馬刀貝大大隻,入口鮮甜,口感十足已經不在話下喇!連佢地個白酒忌廉汁都做到一絲不苟!酒味唔會太濃,而忌廉汁就又香又滑!真係想打包個汁返屋企送飯食!超級滿足!

********************************
泰海鮮 (屯門)
屯門三聖街6號三聖商場地下5-8及14-16舖
*********************************
以上消費:約$500/位
味道:8.5/10
環境:8.5/10
服務:8.5/10

衛生:8/10
抵食:8/10





2017年9月27日 星期三

新舊交纏。太子永興冰室

發現太子有間新興懷舊冰室!又新又舊?即係點呀?因為佢地嘅裝修同環境都比較似新式嘅茶餐廳,之不過食物方面就加入咗唔少特色同懷舊嘅款式~

環境方面好光猛舒服,以梳化卡位為主,不過牆上就用咗帶有舊香港味道嘅壁畫


食物款式都幾多元化,全日推介項目就係最有特色嘅,當中最特色嘅就有吉列安格斯牛扒 、焗咖哩雞飯/鮮茄豬扒飯多士盒!想食得簡單啲嘅,當然都會有常餐、特餐、炒粉麵、湯麵提供

雪糕紅豆冰 跟餐+$18
[分數:8/10]
先嚟杯雪糕紅豆冰!紅豆比例佔4分1,煮到有少少起沙,即使加埋雪糕落去都唔會太甜,不過可能冰粒多咗啲,所以奶味一般般,主要靠雪糕去提味,如果冰粒可以改用埋碎冰/刨冰,感覺就更加懷舊喇!

吉列安格斯牛扒 $168
[分數:7.5/10]
跟友人點了每人一份全日推介套餐~安格斯牛扒可選吉列或和煎,我們當然要選吉列版本!牛扒可跟意粉/飯或薯菜,而我就選了薯菜~薯條的份量蠻多的!醬汁方便就選了磨菇汁!

吉列安格斯牛扒 $168
[分數:7.5/10]
吉列牛扒的外觀有點似炸魚柳,切開後就能看到肉色粉嫩的牛扒,不過脆皮跟牛扒有點分離的跡象,要小心地將牛扒切開才不至完全皮肉分離。入口表面香脆,而內裡則帶點口感,牛扒帶少許肉汁,份量同樣十足!

焗咖哩雞飯多士盒 $68
[分數:8/10]
而另一份套餐就選了焗咖哩雞飯多士盒~多士盒是切切實實的,用一個四四方方的麵包,騰空中心位置,加入咖哩雞飯,然後再放進焗爐。多士盒頂是滿滿的咖哩雞,咖哩汁還多得瀉了下來!再加上金黃色的烤芝士,吸引極了!

焗咖哩雞飯多士盒 $68
[分數:8/10]
多士盒表面香脆非常,咖哩汁帶微辣,薯仔煮得夠腍入味,而雞件則大大件的,同樣惹味!切開多士盒的一息,再翻開咖哩雞,終於看得見白飯了,不論是白飯或麵包配上咖哩汁同吃,一樣相配!不過白飯及麵包同樣是撐胃之物,建議二人分享為佳



巨型梳乎厘 (原味)$88
[分數:8.5/10]
最後的主角就是巨型梳乎厘!!有抹茶及原味可供選擇~雖然梳乎厘比人頭還要大!但由於內裡密度不高,所以作為飯後甜品也不怕~梳乎厘入口綿綿的,由於已經預先加糖,所以無需再添加煉奶。梳乎厘充滿了蛋白香,底部相對濕潤,幾經辛苦下二人終於把這個巨型梳乎厘消滅了!

********************************
永興冰室 (太子)
太子彌敦道776-778號地舖
*********************************
以上消費:$380
味道:7.5/10
環境:7/10
服務:7/10

衛生:7.5/10
抵食:8/10


🍠紫薯紫到悶!嚟個黃蕃薯西多!🍠

近排乜都係紫薯,但其實我對紫薯味只係一般般,純粹鍾意個紫色。所以相比起紫薯,其實我更鍾意黃心 #蕃薯 !由其係日本細細條嗰種!
今次比我搵到間終於唔係用紫薯去整嘅特色 #蕃薯西多 ! #西多 本身都幾厚吓,餐牌仲寫咗 #麵包 係由餐廳自家烘焙,食落都幾鬆軟吓,不過蕃薯蓉啲水份搞到中間啲包濕咗啲!

一切開就見到入面有層厚厚嘅蕃薯蓉!蕃薯蓉經過加工,所以食落都幾甜,建議一開始唔好落咁多糖漿住,試一試個甜度先

#下午茶 價連飲品一份$32蚊,+$15蚊可以轉做蕃薯奶茶。不過其實就咁食件西多都已經幾飽吓,所以我飲檸茶消下膩就算。食紫薯食到悶,整返件黃薯版本都幾有新鮮感!
😆😆😆😆😆😆😆😆😆
價錢: 💖💖💖💖 味道:💖💖💖💓  
賣相:💖💖💖💓  環境:💖💖💖💓  
(5💖最高)
-----------------------------
-----------------------------
👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻
想睇更多吃喝玩樂資訊?快啲Follow我啦!
FB:stellasheafoodiary
Ig: stellasheaa
Blog:Stella's hea食玩部屋

2017年9月24日 星期日

中華滙館 - 一訪隱秘中菜館

以前喺中環返工,成日見到有好幾間餐廳私密度好高,因為喺大門口係完全睇唔到餐廳入面係點,好神祕!所以成日心思思好想入去試吓!所以今次朋友生日,就約咗佢嚟「中華匯館」試吓!


原來餐廳入面唔算好大,但無論喺裝修、佈置、擺設方面都好有品味,既高級又帶有中國風!即使喺餐具同茶壺都獨特過人,而我就對呢隻小鳥碟情有獨鍾!


花雕醉乳鴿 $180
[分數:8.5/10]
頭盤先嚟個「花雕醉乳鴿」!頭盤好少會叫乳鴿,不過呢到嘅乳鴿經花雕酒浸過,變成高級食府真係唔同啲⋯擺碟都特別有心思同靚過人!乳鴿肉質好嫩,花雕味都幾濃,而且好入味!估唔到乳鴿都可以做頭盤~


潮蓮燒鵝 $280
[分數:8/10]
食完醉乳鴿,再嚟個香口啲嘅燒鵝!燒鵝有分例牌$280、半隻$400同全隻$800!人少少叫咗碟例牌試,份量都幾多吓!燒鵝皮又薄又脆~食燒鵝最怕放耐咗,層皮韌到咬唔開!見到呢隻鵝皮薄薄有亮澤已經覺得夠晒吸引!再加埋中間層半透鵝脂!皮脆肉嫩,脂香十足,真係諗番起都流口水!

清湯蘿蔔和牛 $360
[分數:7.5/10]
如果將清湯腩變成清湯和牛 ,唔知會產生咩化學作用呢?!和牛一向俾人覺得又油又邪惡!變一變身配上清湯蘿蔔,個樣清秀咗,成個即時健康晒~
和牛入口又腍又香,雖然同樣有入口即溶嘅感覺,但就少咗份油膩感~有少少可惜嘅係蘿蔔煮得未夠腍,如果連蘿蔔都腍埋就完美喇!

鮮蝦籽火腩粒炒飯 $230
[分數:8/10]
炒飯最緊要粒粒分明,飯粒上佈滿晒細細粒嘅蝦籽!火腩切到細細粒,令炒飯更加香口有口感!另外仲有啲蔥花同雞蛋,成個感覺清而不膩,少咗一般炒飯嘅油膩感!頭先食完咁多肉食之後,再食埋個炒飯,飽晒!


蛋花馬蹄露
[分數:8/10]
奉送嘅甜品竟然係蛋花馬蹄露!馬蹄露賣相晶瑩吸引!雖然稠度略高,但入口清甜涼爽,加上細細粒嘅馬蹄露口感十足,不過呢款甜品其實都幾飽肚,記得預留定少少位食丫


********************************
中華滙館 (中環)
中環士丹利街13號地舖
*********************************
以上消費:$ 1,210
味道:8/10
環境:8.5/10
服務:8/10

衛生:8/10
抵食:7/10


2017年9月18日 星期一

🌝🌝懷舊伍仁月餅🌝🌝

每年總會有一兩款大熱月餅 ,要搶生搶死先撲到盒,今年就嗰個都搶某大品牌嘅流心奶黃月。好彩屋企人唔係月餅控!所以唔洗千辛萬苦咁撲盒返屋企!

相比起試新嘢,屋企人就更鍾意食返啲懷舊嘢~所以今年就買咗盒經典「金腿五仁月餅」俾佢地!仲要揀咗間連月餅盒都復古埋嘅「金記冰室」到買!

屋企人見到個盒已經覺得好有新鮮感!由於我媽係果仁愛好者,所以今年未等到中秋已經開咗第一盒月餅食喇!


金腿五仁月餅 $228 (原價$336)
[分數:8.5/10]
五仁月餅比起蓮蓉月餅真係要花更多功夫!月餅入面除咗有金華火腿絲同瓜子仁、腰果、白芝麻、欖仁、杏仁,呢「五仁」之外,仲有冬瓜餅同桔餅!



金腿五仁月餅 $228 (原價$336)
[分數:8.5/10]
咁多種「仁」夾埋一齊,咬落真係好有口感!味道方面又唔會太甜,咬吓咬吓仲有啲金華火腿嘅鹹香添!感覺比普通月餅健康 !

最貼心嘅係,月餅竟然唔止有膠刀,仲有埋膠叉添!見到嗰時有啲驚喜!

19/9/17前做緊優惠⋯$228/盒 (原價:$336) 真係早買早享受!仲要平幾舊添丫😮
********************************
金記冰室 (灣仔)
灣仔天樂里6-18號恆安大廈地下D及E舖
*********************************
以上消費:$228
味道:8/10
環境:   -
服務:8/10

衛生:   -
抵食:8.5/10