2018年12月10日 星期一

丸十日本食堂-壽司漢堡夠吸引





知道屋企附近新開左間日本野,特登趁假期帶屋企人去試吓!日本野真係好受香港人歡迎,即使係新開無耐,食飯時間都要排隊先食到。


秘製磯煮鮑魚 $128
[分數:8/10]
首先嚟個開胃前菜,秘製磯煮鮑魚!鮑魚煮得唔夠淋又入味,凍食入口口感覺清涼,鮑魚夠鮮味。啱啱好每人一件試一試,開下胃口~




炸軟殼蟹壽司漢堡 $98
[分數:8/10]
丸十最有特色嘅係有幾款壽司漢堡供選擇,我媽咪就最鍾意食炸軟殼蟹,鍾意佢香脆可口~
炸軟殼蟹壽司漢堡入面,除咗有原隻炸軟殼蟹之外,仲有少量蔬菜同完塊芝士。軟殼蟹入口香脆,而上下兩塊壽司漢堡包,米飯一邊中混合左芝麻同牛蒡,所以食落特別香口惹味!




澳洲和牛烏冬 $138
[分數:8/10]
而我爸爸就揀咗澳洲和牛烏冬,澳洲和牛肉質都幾腍,中間帶有少少肉汁,唔會燒到過老。
不過爸爸最欣賞嘅係啲烏冬,烏冬入口彈牙又夠滑,入面仲有隻溫泉蛋添!
將烏冬拌埋溫泉蛋一齊食,味道同口感就更加香滑喇!


鵝肝 $65/串
[分數:7/10]
燒鵝肝一串有兩少見件,鵝肝都算幾厚身,雖然有部分位置燒得過咗少少火位,但燒完總算做到外邊帶微脆,而入面依然保持嫩滑,油脂味都幾香。


自家製鰻魚玉子燒 $68
[分數:7/10]
因為戒嘅澱粉嘅關係,所以我就揀咗鰻魚玉子燒。玉子燒外層蛋味都幾香,入口軟綿綿,入面仲有包著一小件鰻魚,再配上少少鰻魚汁,為玉子燒提味,令味道變得不會單調,如果有埋芝士就更完美喇!


丸十芭菲(草莓) $78
[分數:8/10]
甜品方面,就揀咗草莓味嘅芭菲!真係好靚好吸引啊!入面有士多啤梨雪糕、忌廉、棉花糖、士多啤梨果醬、士多啤梨果肉、馬卡龍、朱古力脆條。馬卡龍唔會太甜,外層脆身內裡煙韌,非常唔錯!士多啤梨果肉夠甜,雪糕忌廉同士多啤梨果醬配搭得好好,唔會出現過甜或過漏嘅感覺。酸酸甜甜嘅芭菲,真係好適合作為飯後甜品~

********************************
丸十日本食堂 (葵芳)
葵芳興芳路223號新都會廣場4樓484-487號舖
*********************************
以上消費:$705
味道:8/10
環境:8.5/10
服務:8/10

衛生:8/10
抵食:7/10





2018年9月21日 星期五

The Farmhouse - 新酒店。新Buffet


爸爸媽咪結婚週年紀念日,同佢地食餐好慶祝下~喺網上見到介紹,北角一間新落成嘅酒店「Hotel Vic」入面,有間叫「The Farmhouse」嘅餐廳做緊優惠,只要讚好佢地Facebook就有85折優惠!見食物款式都有幾多元化,所以就訂定位同佢地試下~


「Farmhouse」顧名思義,用咗農場作為主題,所以全場都係以「木」嚟做主體,再加上一啲綠色植物作點綴。地方尚算寬躺,窗邊位置仲可以邊食邊欣賞夜景。


入到去最先會見到放滿甜品、冷盤、沙律同前菜嘅雪櫃。 Cold Cut選擇都算多,有莎樂美腸、巴馬火腿、風乾牛肉同火腿片,再配上芝士作為頭盤都係唔錯嘅選擇。


然後就會見到放滿海鮮嘅凍櫃,有麵包蟹、波士頓龍蝦、翡翠螺、凍蝦同大蜆!後面有個鐵籮,做到啲龍蝦好似一瀉而下嘅感覺。

有一樣幾令人意外嘅係,餐廳設有鮮搾果汁,有專人負責即叫即搾,旁邊用嚟搾汁嘅生果有時會轉下,但主要會以蘋果、雪梨為主,另外亦會有甘筍、西芹呢類蔬果。最好嘅係,鮮搾果汁可以無限添飲,唔似一般自助餐,只包一杯咖啡或茶。


刺身櫃同樣有專人負責,大大隻嘅赤蝦最為吸引,其次係厚厚嘅帶子,另外亦有油甘魚、三文魚、吞拿魚、八爪魚等刺身⋯



再行入啲,就係擺放熱食嘅地方。首先會見到大大舊即切西冷。而另一邊就有燒羊𣕧、燒牛仔骨、煎三文魚、吉列豬排等肉食,旁邊仲有薯角同粟米粒,可當作拌菜。


最吸引我嘅就係呢個大圓芝士!意粉即叫即製,有意粉、通粉或闊條麵。配料就有辣肉腸、蜆肉、洋蔥及彩椒。而醬汁,就可選蕃茄醬/白汁。意粉將近煮好時,大廚會加入大量的芝士跟意粉拌匀,芝士味甚濃!


東南亞食品方面,就有多款不同口味的咖哩及薄餅供選擇。薄餅有厚有薄,咖哩亦有羊肉、牛肉及蔬菜可供選擇。




港式食品種類甚多,上至燒味,下至街頭小食亦有提供。燒味方面有即切乳豬、叉燒、油雞⋯街頭小食就有咖哩魚蛋、豬皮、蘿蔔、牛肚等等⋯


有西式即煮意粉外,亦有中式即製粉麵,配料比西式多一點,有牛腩、牛筋、扎肉、豆卜及蔬菜等⋯
旁邊還有數款蒸點,有馬拉糕、蒸餃、奶黃包及荷葉糯米飯~




甜品方面,有蛋糕、曲奇、酥餅、泡芙可自行任取。亦有即焗梳乎厘及即製班戟供選擇。


而最特別的,就是設有大大部旋轉雪糕櫃,關上時雪糕櫃會自轉,轉到心水的雪糕/雪條時,才開雪櫃取出即可。雪糕/雪條方面,有經典的紅豆樂、橙冰、鳳仙,亦有Häagen-Dazs及Mövenpick !



龍蝦唔會食完一轉就無,所以可以等佢拎過一批新嘅出嚟先出去拎~可以揀啲滿晒橙色膏嘅~




食物款式都算多,每樣試一件都已經夠晒飽~食物方面會推介羊𣕧~肉質夠嫩滑,大大件,燒得唔錯~

自助晚餐價錢:
星期一至四 成人每位$598、長者及小童每位$299
星期五至日、公眾假期及前夕 成人每位$668、長者及小童每位$334
(+10%服務費)
******************************
The Farmhouse
北角北角邨里1號海匯酒店西座2樓
******************************
以上消費:$600/位
味道:7/10
環境:8/10
服務:8/10

衛生:7.5/10
抵食:7/10

2018年9月2日 星期日

蔡瀾越南粉-慕名而來



由食家「蔡瀾」開嘅越南粉,單係個名已經吸引到唔少人慕名而來!新店位於中環地段,以為價錢會好貴,但牛肉粉最平$68蚊已有交昜,而且越南粉係免費任加!即係$68蚊包飽!喺中環嚟講都真係幾抵食!

餐廳主打當然係一系列嘅越南粉,可自選不同組合。亦有湯檬、多款小食、沙律、時菜、甜品同飲品供選擇。





特別牛肉湯河粉 $128
[分數:8/10]
特別牛肉湯河,最特別之處就係可以俾你一次過試齊7款自選配料,當中包括:生牛肉、金錢腱、牛腩、牛筋、貝殼牛肉丸、銅錢牛鞭花同牛栢葉。
另外,仲會附上大量香葉俾你自行加入,有九層塔、鵝芥、洋蔥、芽菜等等⋯








生牛肉、金錢腱、牛腩
先講講肉類,每樣有少少,生牛肉比較薄,送上黎時半生熟,啱啱好。金錢腱厚身少少比較有口感。而牛腩都煮得夠腍。





貝殼牛肉丸、牛栢葉
牛丸有兩粒切半,入口爽口彈牙,唔錯。牛栢葉幾爽口,不過切得比較細件。


銅錢牛鞭花、牛筋
銅錢牛鞭花同牛筋切得比較細粒,所以搵咗一陣先搵到,呢兩樣味道會比較淡,牛筋好腍,牛鞭花帶少少韌力。





越南粉
先講講湯底,入口都幾鮮甜,唔算太油,因為鐘意濃味啲,所以自己放咗好多香葉同青檸落去,味道更加豐富。而越南粉係由餐廳自家制作,入口好滑,質感好輕盈,不知不覺就食晒一碗。食完可以再添~會用碗仔裝一碗俾你~澱粉控啱晒!





越式炸春卷 $48
[分數:8/10]
炸春卷即叫即炸熱辣辣,用生菜包著食,減少膩感就啱晒~入面肉絲、粉絲、蘿蔔絲、木耳絲,口感豐富又香口。


紅茶雪糕 $32
[分數:8/10]
雪糕有3種,分別有椰汁、紅茶及榴蓮味,而我就試咗紅茶味,茶味都幾香濃,甜而不膩,值得一試


越南多色冰 $28
[分數:7.5/10]
多色冰非常足料!入面有成5種顏色嘅配料,底下綠色同粉紅色嘅有啲似馬蹄,比較爽口。藍色係類似啫喱嘅粉條,而黃色就係綠豆。椰汁做底,上方仲有刨冰!好抵飲!

********************************
蔡瀾Pho
中環威靈頓街15-25號地舖
*********************************
以上消費:$236
味道:8/10
環境:8/10
服務:8/10

衛生:8/10
抵食:7.5/10


2018年7月18日 星期三

花木日本料理 - 精緻高質日本料理


每次有朋友生日,搵餐廳嘅重任通常都由我嚟承擔!今次俾我搵到一間喺尖咀新開無耐嘅日本料理~係新到一張相都未有!即刻打電話訂位去試下新野~
好好彩~!原來提早訂位會有甜品送!而且新張期間,店員話仲會免費送「前菜3道」添!真係令人期待!


「花木」嘅環境同餐廳名一樣,餐廳主要用咗木色,周圍都有啲綠油油植物做點綴~地方好靚好舒服~因為比較早到餐廳,所以未有太多人,啱晒我地幾個人傾計同慶祝~大概7點令8點就會開始陸續有人。


免費送贈嘅前菜3道!超有驚喜!!完全無諗過送嘅前菜會靚成咁!擺到成個盆景咁!
入面包括有:
-鰹魚酒盜忌廉芝士
-麵豉醬配青瓜
-炸澤蟹

鰹魚酒盜忌廉芝士
[分數:8/10]
前面細細粒係鰹魚酒盜忌廉芝士,忌廉芝士上面放咗鰹魚肝提味,入口唔會太鹹,芝士好香好軟滑~

麵豉醬配青瓜
[分數:8/10]
食完帶鹹香嘅芝士後,食返粒青瓜,感覺零舍清爽~覺得淨係食青瓜有啲單調?其實旁邊伴有一小碗麵豉醬,青瓜配上麵豉醬後唔單止令味道變得更加豐富,更可以特顯到青瓜嘅清甜~


炸澤蟹
[分數:9/10]
雖然店員叫我地要趁熱食,但呢隻蟹仔實在太可愛!其實一開始店員未介紹佢叫「炸澤蟹」嘅時候,我一直以為佢係裝飾品,因為蟹身帶有光澤,真係好似一件陶瓷裝飾!忍唔住拎上手欣賞一番先放入口~蟹鉗蟹腳炸到脆卜卜,蟹身就帶硬脆口感,帶玩味又好食~




「松」刺身(8點刺身)$788
[分數:9/10]
刺身有「松」、「竹」、「梅」,3款選擇,分為8點、6點、4點。
我地所點嘅「松」,分別有以下8款刺身:
北海道海膽、真鯛、平政、深海池魚、大拖羅、牡丹蝦、帆立貝、赤貝
每件刺身表面都帶光澤新鮮非常,當中我最鍾意同欣賞嘅就非大拖羅莫屬!魚脂分佈平均,不帶任何根位,入口即溶,魚脂香而不膩,已經好耐無喺香港食過完全無根嘅大拖羅了!超幸運丫!





北海道海膽、牡丹蝦
除咗大拖羅之外,北海道海膽同牡丹蝦一樣夠晒吸引!海膽甘香鮮甜不帶苦味,牡丹蝦蝦身肥美晶瑩,入口同樣鮮甜,肉質爽滑富彈性,再品嚐一下甘香嘅蝦頭膏,實在完美~


清酒煮蜆$108
[分數:9/10]
清酒煮蜆嘅份量都幾多,蜆肉大大粒,食咁多粒完全唔會有食到有沙粒喺入面,蜆肉好鮮甜,帶淡淡嘅酒香。底下嘅清酒蜆湯,味道同樣鮮甜,食蜆嘅時候,記得連埋少少蜆湯一啖放入口,味道會更加濃郁鮮甜~不得不提嘅係,煮蜆入面仲加入咗爽脆嘅黑木耳,增加口感之餘,仲可以令成道菜變得更加健康!


沖繩豚肉炒苦瓜$108
[分數:8.5/10]
其實我一向都唔鍾意食苦瓜,之前都有食過沖繩苦瓜,喜歡苦瓜嘅人會好鍾意佢嘅「甘」味,但我就真係覺得好苦!不過朋友想食所以就叫咗一碟,起初諗住夾一件試下味就算,但試完之後我竟然會再食!師傅巧妙地用咗雞蛋去包著苦瓜同豚肉,令到入口一刻有嫩滑嘅口感,最神奇係今次嘅沖繩苦瓜食落只係有苦瓜原本嘅味道,但就無咗嗰陣苦澀味!相比之下,豚肉嘅風頭絕對比苦瓜蓋過咗~




牛肋條$388
[分數:7.5/10]
食咗咁多款海鮮,黎翻個紅肉中和下~大大條牛肋條,真係啱晒鍾意食肉嘅我~店方好貼心咁喺上枱前已經張肋條切成一片片,適合多人分享~肋肉近骨位置有少少脂肪,所以食落比較香口,不過下次會要求唔好咁熟,肉質應該會再嫩滑啲~


小倉白玉蕨餅 (原價$98)
[分數:8.5/10]
最後係訂位所送嘅甜品~喺餐牌睇返,原來個甜品係要$98蚊!白玉同蕨餅都係店方自家製,白玉可以配紅豆一齊食,前者口感煙韌,後者紅豆大大粒,亦唔會太甜。蕨餅沾有黃豆粉,黃豆粉好香,口感方面會比白玉腍啲感覺清爽啲,如果可以再送多兩粒就好喇~!

******************************
花木日本料理 (尖沙咀)
尖沙咀天文台道8號3樓2號舖
******************************
以上消費:$1,532
味道:8.5/10
環境:8.5/10
服務:9/10

衛生:9/10
抵食:8/10