2017年9月15日 星期五

富臨-遲來的黃油蟹

經常都遲一步,8月尾先同屋企人去食黃油蟹。其實咁耐以嚟,都只係同屋企人食大閘蟹,今次見富臨有做黃油蟹餐,價錢唔算太貴,就同屋企人去試吓!

4位用嘅極品黃油蟹餐 ,價錢係$1,480 。個餐都算幾多嘢食,分別有6餸1湯,當中包括咗半隻乳豬,同每人半隻黃油蟹!


脆皮乳豬 半隻

[分數:7.5/10]

由於4人份嘅乳豬只有半隻,所以上碟時賣相比較趣怪,不過酒家都幾有心思,將佢砌到好似打側身咁!乳豬都燒得幾脆,而且脂肪唔算多,不過有啲位置燒得過咗火,有少少苦味。


黃油蟹 2隻 (每位半隻)

[分數:7/10]

兩隻蟹之中,其中一隻爆晒膏,而另一隻就無咁多,經理話可能因為係水尾,早少少食會再靚啲~爆膏嗰隻啲膏一啜就吸到出嚟,帶膏香,比大閘蟹淡味少少,但入口即溶,食落唔太漏。

黃油蟹 2隻 (每位半隻)

[分數:7/10]

原本以為黃油蟹都有分公乸,一開始問經理係咪因為一公一乸所以蟹膏多少有差距,但原來黃油蟹全部都係蟹乸!上網睇番黃油蟹係因為喺炎炎夏日,膏蟹產卵嘅時候,鍾意棲身喺淺灘畔曬太陽。潮退時,陽光令淺灘嘅水溫升高,所以令到蟹身入面嘅膏分解成紅黃油質喇!不過睇完覺得有啲好笑,好似俾太陽曬熟咗咁!


原盅燉嚮螺湯

[分數:8/10]

原盅燉湯非常足料,入面有螺頭、瘦肉、雞件、淮山、杞子等等⋯一盅湯入面就有成碟材料,而我就最鍾意食入面嘅雞腳同螺頭喇~嚮螺湯好鮮好甜,雖然落咗雞入去煲,但個湯完全唔油,唔錯。

XO醬爆蝦球蚌片

[分數:7/10]

當中最惹味嘅就係呢道XO醬爆蝦球蚌片!蝦球大大粒,都算爽口。蚌片份量都足,不過有啲唔夠爽口,而底下就用咗西蘭花墊底。開始食嘅時候覺得唔算太辣,但食多兩件就開始慢慢辣出嚟,所以食唔到辣嘅朋友要小心啲!

古法蒸龍躉

[分數:8/10]

幾款小菜之中,我最鍾意就係呢碟古法蒸龍躉!龍躉大大件!好鍾意佢層又厚又有口感嘅龍躉皮!而且魚肉蒸得岩岩好,肉質都幾嫩滑。而上面就放咗冬菇、肉條同芫茜提味!油份多咗少少,但整體嚟講都算唔錯


生煎菜肉包

[分數:8/10]

生煎菜肉包反而最有驚喜!真係估你唔到! 雖然睇落係最普通,但佢將底面兩面都煎到脆脆地,包嘅外皮唔會太厚,外脆內軟!肉餡仲帶有肉汁添!最重要係熱辣辣,一定好食啲!

桂花糕

[分數:7/10]

賣單前問啲姐姐套餐有無包糖水/生果,之後佢就拎咗碟桂花糕比我地~桂花糕都幾大件吓,不過口感同一般有啲唔同,應該魚膠粉落重手咗,所以有啲似啫喱糖,屋企人就鍾意佢唔會太甜,口感都幾得意丫~

********************************
富臨皇宮 (葵芳)
葵芳榮芳路恆景花園商場2樓201-204號
*********************************
以上消費:$ 1,720
味道:7/10
環境:7.5/10
服務:7/10

衛生:7/10
抵食:7.5/10





沒有留言:

張貼留言