2018年1月30日 星期二

👩🏻‍🍳🌹唐宮小聚開幕活動🌹👩🏻‍🍳



荃灣唐宮小聚開咗喇~好開心即場有星級大廚Jacky Yu 教整玫瑰花包包同流心湯丸~我都整得幾靚㗎~









原來玫瑰花包無我想象中咁難整,只要將5片圓型皮疊好卷埋,再慢慢反啲花瓣就完成~






反而湯圓要皮薄餡靚,薄得黎又唔會爆餡先最難!我有兩粒都衰咗!而且包得好慢!



另外仲即場試咗佢地黑金流沙包同黃金魚皮~流沙包一搣開就爆晒啲流沙出黎!加上黑配金嘅賣相,食落都矜貴過人~黃金魚皮即炸即食真係比食現成包裝嘅好好多!熱辣辣脆卜卜!蛋黃味都濃郁啲~
💃🏼💃🏼💃🏼💃🏼💃🏼💃🏼💃🏼💃🏼
-----------------------------
唐宮小聚 (荃灣)
荃灣楊屋道1號荃新天地1期UG層43及81號舖
-----------------------------
👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻
想睇更多吃喝玩樂資訊?快啲Follow我啦!
FB:stellasheafoodiary
Ig: stellasheaa
Blog:Stella's hea食玩部屋

2018年1月26日 星期五

Pasta Zone-平食正宗意大利手工意粉


前排葵廣當旺,近排發覺觀塘同將軍澳彈起!所以今次同大家介紹一間喺觀塘工廈嘅一間意大利小店!真係有意大利人坐陣㗎!
小店主打各款手工意粉同雲吞,有幾款真係未曾試過,最重要係每碟只係$68-$75!性價比高! 抵食

蒜蓉煮青口 $48
[分數:8/10]
份量足,細細粒容易食,多人share就最啱~除咗蒜蓉仲加咗啲意大利臘腸粒提味,所以鮮甜之外,仲帶幾分咸香,令味道變得更加豐富





巴馬火腿配蜜瓜 $38/3件
[分數:7/10]
小食之中最特別嘅一定係巴馬火腿配蜜瓜,整到成隻帆船咁,大大件夠吸引!味道方面,嗰日嘅蜜瓜夠甜夠多汁,唯返$13蚊左右一件,抵食!




手工扭紋粉配車厘茄汁 $68
[分數:8.5/10]
幾款特色意粉入面,我最鍾意嘅就係呢款!個樣有啲似螺絲粉,但食落超有口感,好煙韌!另一方面,因為佢比較幼身,所以又唔會得表面有味!配埋酸酸地嘅車厘茄汁,好醒胃!


貓耳朵配鯷魚橄欖汁 $68
[分數:8.5/10]
貓耳朵反而無想像中咁有咬口,比較薄身,容易入味。但口感會比扭紋粉軟反些少!鯷魚橄欖汁比較少見,個樣有啲似中式啲欖菜,橄欖味都幾濃下,仲有少少鯷魚嘅咸鮮,都幾特別


手工小方型牛肉餡配忌廉汁 $68
[分數:7/10]
呢款我會覺得乾身咗啲,而且雲吞仔細細粒,唔係好感受到佢入面嘅牛肉餡,可能始終偏愛有口感嘅野,雖然佢都入味,但就好似食緊齋意粉咁,所以衣款我一般


手工大方型牛肝菌芝士雲吞 $75
[分數:8.5/10]
大方型個感覺就好好多喇!雖然佢個賣相唔多討好,但味道真係好濃!尤其鍾意牛肝菌味嘅話就啱晒!大大隻嘅雲吞入面同樣包有肉餡,始終大隻啲肉餡多啲,味道點都濃郁啲同有口感啲


蕃茄汁豬肉丸手工麵 $68
[分數:8.5/10]
個樣有啲似平時喺ikea食嘅肉丸,但口感味道完全唔同!肉同麵粉嘅比例完全唔同,依到嘅豬肉丸你會感受到真係有「肉」,而唔係牛丸無牛嘅感覺~意粉同樣係手工製,所以你會見到有啲起角而唔係好圓滑,食落口感同普通意粉唔同架~!


士多啤梨雪糕配黑醋 $28
[分數:9/10]
甜品只有雪糕同咖啡好似無乜特別?其實士多啤梨雪糕本身個味道巳經同一般嘅有好大分別,質感有少少似雪葩,感覺清爽啲,入口酸酸甜甜。不過最特別係會喺雪糕上再加啲黑醋!黑醋配鵝肝肉食就見得多,但估唔到係加落雪糕竟然都好match!好好食!(大家喺屋企試嘅話,記得唔係用點麵包好稀嗰種,係要加傑身好似漿嗰隻,味道香甜好多㗎!)
.

雪糕咖啡 $28
[分數:8/10]
鍾意飯後一杯啡嘅,就可以揀依款雪糕咖啡,espresso做底,再加曲奇雪糕。依個我無試到,聽朋友講加完雪糕無咗espresso嘅苦,但好香咖啡味,飯後甜品連咖啡一杯過都唔錯~

🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹🇮🇹
價錢:💖💖💖💖 味道:💖💖💖💖
賣相:💖💖💖      環境:💖💖💖
(5💖最高)
-----------------------------
Pasta Zone (觀塘)
觀塘開源道60號駱駝漆大廈3期1樓J室
-----------------------------
👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻
想睇更多吃喝玩樂資訊?快啲Follow我啦!
FB:stellasheafoodiary
Ig: stellasheaa
Blog:Stella's hea食玩部屋

2018年1月17日 星期三

城寨風味-首嚐鱷魚背膠

聖誕同屋企人唔食西餐食中餐!唔怕同人迫之餘又唔會坐地起價~之前都有去過城寨風味,記得啲菜式比其他餐廳特色啲健康啲,而且又可以度身訂做!
今次帶屋企人食特別啲!喺門口巳經有大大個餐牌介紹!係連我自己都未食過嘅「富甲天下」!想知究竟係乜就睇落去啦!

七味黃金豆腐 $68
[分數:8.5/10]
先食個小食-七味黃金豆腐!出面好多時都係炸豆腐粒,而呢到就會切成一件件。外層脆皮好薄,但入口仍然好脆!而豆腐就好嫩滑,熱辣辣好好食!


川貝海底椰燉鱷魚肉1鼎 約$65/位
[分數:8/10]
燉湯就揀咗川貝海底椰燉鱷魚肉,鱷魚肉同川貝一樣可以止咳,加埋海底椰啱晒冬天飲!而且一盅盅咁上,夠晒熱飲完暖笠笠~下一道菜「富甲天下」同鱷魚都有關係㗎~

富甲天下$1688
[分數:8/10]
重頭戲嚟喇!「富甲天下」!碟邊仲有隻鱷魚襯埋添~而中間一大塊凹凹凸凸嘅其實係鱷魚背膠!因為佢本身無乜味,所以主要靠個汁嚟提味,所以望落會有啲似炆花膠咁。


富甲天下$1688
[分數:8/10]
背膠入面一粒粒凸起嘅野原來係好似核咁,唔食得嘅~而背膠我會覺得似花膠同海蔘嘅混合體,口感似海蔘,但又帶點花膠嘅舔口,幾特別。應該都有幾多骨膠原!

米蘭野菌帶子$178
[分數:7/10]
乾身嘅帶子比較少見,底下再配埋炒野菌,兩者仲加咗香草落去炒喺其他地方暫時未見過依款菜式~野菌經炒香後變得更為香口,相比之下佢嘅味道竟然比帶子更加吸引!

荷葉花旗蔘蒸雞$168
[分數:7.5/10]
荷葉飯就食得多,但淨係蒸雞又真係少啲,而且仲加咗花旗蔘入去!不過放心,花旗蔘味唔算太重,所以唔會有苦味~蒸雞夠嫩滑,帶淡淡荷葉香。另外雞面上仲有少少紅棗杞子提味,感覺夠晒滋補!

魚米龍躉泡飯$148
[分數:8.5/10]

泡飯入面加咗大量菜粒,睇落好清好健康,另外仲加咗啲蔥花、芫茜、冬菇提味,而啡啡白白嗰啲就係龍躉粒喇!泡飯湯底好鮮甜,飯粒軟硬適中,加上大量嘅菜粒,即使食完咁多野都唔覺有膩感,唔會食唔落~

******************************
城寨風味 (九龍城)
九龍城南角道6-6A地下
******************************
以上消費:人均$500
味道:7.5/10
環境:8/10
服務:8/10

衛生:8/10
抵食:8.5/10

2018年1月9日 星期二

🥪重量級韓式吐司🥪




🥪重量級韓式吐司🥪
灣仔最近新開咗間吐司咖啡店,其實佢地無特別寫明係 #韓式 #吐司 ,之不過一睇佢個樣就會令人諗起 #韓國 #Isaac !不過相比之下,呢間嘅款式會更多,而且仲幾有創意添!
💁🏼‍♀️💁🏼‍♀️💁🏼‍♀️💁🏼‍♀️💁🏼‍♀️💁🏼‍♀️💁🏼‍♀️💁🏼‍♀️💁🏼‍♀️💁🏼‍♀️
手打安格斯芝士漢堡吐司+飲品 $63
[分數:7.5/10]
入面件手打漢堡真係超巨型!基本上就咁拎起食係無乜可能!入面仲有芝士、粟米蛋同大量椰菜絲!漢堡都幾多肉汁,但正因為咁,底下塊包食到一半時已經吸到淋晒,所以最好一係食快d,一係拎開底嗰塊包先!
🍔🍔🍔🍔🍔🍔🍔🍔🍔🍔
煙背肉芝士吐司 $33
[分數:7/10]
煙背肉同煙肉其實差唔多,重點係佢無咗嗰行脂肪!不過呢款就比較鹹啲,如果佢落多少少士多啤梨醬中和下,應該會好好多。同埋多士無乜牛油,雖然肥就肥啲,但用多啲牛油煎香塊包應該會仲正!
🥪🥪🥪🥪🥪🥪🥪🥪🥪🥪
美式士多啤梨S’ mores吐司 $24
[分數:8.5/10]
最鍾意個甜品!賣相夠吸引!多士好體貼地已經切開咗,所以拎上手時啲綿花糖唔會整到周到係!多士夠脆,上邊又有薄薄一層榛子醬,加埋片士多啤梨片中和下個甜度,好食得黎又唔會太漏!$24蚊抵食!
🤔🤔🤔🤔🤔🤔🤔🤔🤔🤔🤔🤔🤔
望見店名,令我記起曾幾何時都聽過一句‘’You Deserve Better ‘’耐人尋味嘅一句說話。不過點都好,人總要向前看。唔知下次聽到‘’You deserve it‘’呢句,又會係正定負面呢。
🥪🥪🥪🥪🥪🥪🥪🥪🥪🥪🥪🥪🥪🥪
價錢:💖💖💖💖  味道:💖💖💖💓
賣相:💖💖💖💖  環境:💖💖💖💓
(5💖最高)
-----------------------------
Deserve Better Toast & Coffee (灣仔)
灣仔灣仔道181號長春大廈C舖
-----------------------------
👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻
想睇更多吃喝玩樂資訊?快啲Follow我啦!
FB:stellasheafoodiary
Ig: stellasheaa
Blog:Stella's hea食玩部屋

2018年1月7日 星期日

壹級日本料理-大大碗。抵食晚市丼飯!


假期入大圍搵朋友,夜晚帶我去咗間幾抵食嘅日本餐廳打邊爐!平時好少去大圍,原來街市出面有幾間好似獨立屋仔嘅都係餐廳嚟~





晚市時段有丼飯/拉麵套餐,亦可以散叫。另外仲有日式火鍋類,有雪酒准山雞、安格斯生牛肉同黑豚鍋。火鍋本身已包一盤蔬菜,如果想要多幾款就可以自行另加。


極上三文魚腩(6片) $98
[分數:8.5/10]
食日本野點都會想食下刺身!所以一開始就先嚟個極上三文魚腩!魚腩上面深深嘅格紋真係夠晒吸引!
食落爽爽地,之後係陣陣油脂香!魚油多得黎又唔會太漏!開飯前每人2-3片就啱啱好~


藍旗呑拿魚蓉帶子蟹籽丼飯 $98
[分數:8/10]
自選配搭晚餐有平有貴,最平只係$38蚊就有份!我地就分別叫咗兩個飯~
分別係:藍旗呑拿魚蓉帶子蟹籽丼飯同蟹特盛!
藍旗呑拿魚蓉帶子蟹籽丼飯,個名夠晒長,認真架勢!出到嚟實物一樣令人眼前一亮!呑拿魚蓉夠晒多!上面仲有蟹籽、芝麻粒同帶子做陪襯~
啖啖都感覺到呑拿魚蓉嘅軟綿、蟹籽嘅鹹鮮同淡淡嘅芝麻香,每啖嘅口感都非常豐富!


蟹特盛 $88 
[分數:8/10]
如果唔鍾意食生野,就可以揀蟹特盛!入面有松葉蟹膏、蟹肉、蟹柳同蟹籽~同呑拿魚蓉丼一樣咁豐富!平時食有蟹肉嘅野,啲蟹肉多少撕到碎濕濕,得少少蟹肉絲咁,但呢到嘅蟹肉真係一舊舊!所以食落唔會太淡,而且飯上面仲加咗味素,再加上蟹膏,味覺絕不單調!
和風炸餃子(2隻) 跟餐+$18
忌廉蟹肉薯餅(2件) 跟餐+$18
[分數:8/10]
小食炸物方面,晚市套餐可以加$18就有兩件!我地加咗炸餃子同忌廉蟹肉薯餅。餃子炸得好脆身,個外皮卜卜脆好香口。而蟹肉薯餅就表面鬆化,入面就係滿滿嘅薯蓉,而正中間位置就有少量忌廉,令薯蓉保持濕潤同口感更加順滑,大大件好抵加!


安格斯生牛肉鍋 $188
[分數:8/10]
其實今次嚟最主要嘅目的就係打邊爐,天氣凍凍地食就最啱~3款鍋底之中我地揀咗牛肉~啲安格斯生牛肉片切到成塊牛扒咁!當然係薄切啦!但望落巳經夠晒吸引!另外仲會跟埋一大份蔬菜,有豆腐、冬菇、金菇、小唐菜、紅蘿蔔等等⋯連埋大大個鍋可以另外加料打邊爐!



安格斯生牛肉鍋 $188
[分數:8/10]
牛肉鍋本身無跟麵食,我地追加咗份手打烏冬!安格斯牛大大片,相比起平時嘅肥牛,脂肪比例明顯少好多,食落肉味會重啲,再配埋烏冬底同啲蔬菜,真係成碗牛肉烏冬咁!最好嘅係佢地嘅烏冬夠彈牙有口感!最怕食到啲軟淋淋嘅,真係會影響晒成個鍋!抵加!

******************************
壹級日本料理 (大圍)
大圍美田路30號美林邨熟食亭1-4號舖
******************************
以上消費:$582
味道:7.5/10
環境:8/10
服務:8/10

衛生:8/10
抵食:8.5/10

2018年1月5日 星期五

🍵🍰葵芳人氣新Cafe🍰🍵



新都會新裝後真係比之前吸引好多!有MUJI又有UNIQLO!遲吓仲有埋一田添!而餐廳方面都增設咗幾間,除咗有長期排長龍嘅Simple Life,另外仲有依間L.D.K. by Ufufu Café

人流比Simple Life少啲,不過食飯時間都總係要排!所以我就喺4點令5點嘅時候帶屋企人試吓,反正Menu上嘅食物無分時段供應,無謂同人迫


和牛漢堡扒佐法國鵝肝 $168
(分數:7.5/10)
鐵板上,都幾香。鵝肝嘅質素係高於預期!厚身之餘中心位置又無整到老晒,不過油香就一般般喇。和牛漢堡扒一樣好厚身,有肉香,但就嚡咗啲~







跟餐+$48 
(分數:6/10)
跟餐有酥皮湯、沙律同白飯。酥皮湯唔得,酥皮完全唔香,湯太稀同酥皮完全唔配。沙律就幾新鮮,配酸汁幾開胃



白芝士咖哩炸雞讚岐烏冬 $88
(分數:8.5/10)
呢個烏冬最好食,不過個汁似忌廉咖哩多過芝士咖哩。味道濃淡適中,因為有大量芝士咖哩汁,所以食落好香滑。加上炸雞熱辣辣,烏冬有口感,屋企人都讚


日式芝士肉汁蛋包飯 $88
(分數:8/10)
遠睇以為上邊黃色嘅係滑蛋?其實係一層厚厚嘅芝士!所以一定要襯熱食,凍咗就會變到硬晒!滑蛋都算嫩滑,但蛋香味就淡咗啲,而入面嘅飯就巳經拌入咗些少肉汁,所以食嗰時飯同汁撈得唔夠匀都無問題!

整體嚟講價錢唔算平,但質素同相量都成正比,今次食完主食巳經飽晒,所以未試甜品,會有興趣去多次試埋嘅~
🍰🍰🍰🍰🍰🍰🍰🍰🍰🍰🍰🍰🍰🍰
價錢:💖💖💖       味道:💖💖💖💖
賣相:💖💖💖💖  環境:💖💖💖💓
(5💖最高)
-----------------------------
L.D.K. by Ufufu Café (葵芳)
葵芳興芳路223號新都會廣場3樓345A號舖
-----------------------------
👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻👋🏻
想睇更多吃喝玩樂資訊?快啲Follow我啦!
FB:stellasheafoodiary
Ig: stellasheaa
Blog:Stella's hea食玩部屋