2015年11月15日 星期日

I am a foodie - 由見習到殿堂之路

終於用咗1年零4個月嘅時間完成咗自己目標由「見習」成為「殿堂」,可能好多人都會覺得有乜特別?好似打機升等咁,係啲虛擬嘅野,最低B係,竟然用哂自己真名真相打機!不過唔緊要啦~都用咗咁耐返唔到轉頭!(不過如果真係由頭黎過,我會影張靚啲嘅相同改個易記啲嘅名既⋯)係衣年幾入面,打食評已經完全融入我生活不論去到邊,一有時間又打返幾句,見我由年幾前開始有cap圖紀錄自己嘅進度就知我對衣樣興趣有幾著緊,真係分分鐘著緊過自己份工(殊!)所以升咗上殿堂之後都想正式打返一篇去紀錄些少難忘嘅回憶同當中嘅辛路歷程

年幾前無無聊聊突然間心血來潮係openrice開咗個acc打食評,打下打下有一日有朋友話係排行榜見到我,見到當時重係嫩草仔嘅自己竟然上咗第2名,哇~緊係勁開心啦!於是就的起心肝繼續打繼續打

打下打下終於升上卓越!基於想升lv嘅心態,打文打到瘋狂,試過因為食得唔夠夠野怕無文交,瘋狂到星期六同日重會突登去掃街,或者去商場一日食7至8間食店食食食,之後分開每日交幾篇!

當然係升級嘅路上總會有點阻礙,突然殺出個程咬金...大佬我日日交2-3篇文都得2千幾分⋯突然有個人4千幾分⋯無可能追到⋯之後有人發現原來有人係偷人相!可惜一直無人理⋯所以嗰排真係超氣憤!不過好彩無因為咁而氣餒!


升完卓越後再睇下⋯死啦⋯原來再升係要有編輯推介先有得再升!之後就開始參考下過往嘅推介文,原來要詳細同打好啲先會拎到嘅!好啦!再每篇都短短嘅文開始越打越長!但試咗幾篇都係無嘅⋯唉,真係有啲心灰意冷⋯突然有一日發現有篇打咗大半個月前嘅文竟然拎到編推!哦!原來編推係要時間嘅!興奮興奮!要繼續加油!上面衣篇就係我第一篇拎到編推嘅文啦~

之後會不斷搵啲特色餐廳介紹~見到自己嘅食評同一時間有兩篇係排行榜,真係感到好安慰

5個月之後終於都夠咗100篇文同20篇編推升到上資深啦!由一個小小嘅勳章變做閃閃嘅鑽石!對好多人黎講可能唔覺得係啲咩,但對於日日打文打到兩三點都唔訓嘅我黎講真係意義重大!好!下個目標係1年內殿堂到!

不過重要拎多30篇編推,都真係有啲難道,重要迫自己係短時間內完成,自己製造好多壓力比自已,好想偷下懶慢慢打,不過人總要啲推動力先有進步嘅,竟然誤打誤撞比我拎到飲食達人2015!之後個人又充滿力量咁繼續落去!(打不死嘅精神XD)

還掂打開文,見人地好似post係好多個唔同嘅平台,自己又放下上Facebook,Ig,ublog等⋯唔同既平台,見有新apps又post下,竟然又比我拎到Elite14'15',之後又認識到一班新朋友~



之後又有一日收到Yahoo嘅email,介紹咗一個佢地發展緊嘅新apps,有新野wor!又post下先!之後就開始見到自己部分文會轉載到Yahoo!!!興奮嘅感覺難以用筆墨去形容!!


到前排收到新假期email想借用我嘅食物相!新假期竟然留意到我?!喜出望外!認真講,唔洗問我啦!有岩洗嘅拎去啦!當然要寫返我個名啦XD 拎得越多越好啊~哈哈

見到係升完資深後發生完咁多事之後先到「殿堂」就知時間係過咗幾耐。最終用咗1年零4個月嘅時間,亦咁岩係我生日前兩日,我終於得咗啦!雖然因為係近幾個月發生咗一啲事令我有接近一個月嘅時間係無心情打文,時間長咗,不過總算完成到自己嘅目標,不過再之後無咗等級嘅限制,下個目標又會係咩呢?升上「殿堂」似是終點但又似是一個新開始,希望係我升上殿堂同生日後,我嘅人生都有一個美好嘅新開始啦~^_^

沒有留言:

張貼留言