2017年10月10日 星期二

老夫子-童年回憶

出賣年齡系列!老夫子漫畫!
唔好話我知你未睇過丫!
平時好少會介紹卡通/人物主題餐廳,因為覺得真係好唔抵食!明明同一樣野(尤其係食咖哩飯嗰間呢),純粹砌到個樣唔同,甚至只係加塊公仔牌就收貴幾十蚊!
不過今次依間老夫子主題餐廳撇除咗童年回憶 呢個因素外,佢嘅性價比明顯俾一般高,而且食物款式夠多。
帶大家上樓上睇吓啦!

上到2樓轉身一望,你會見到好多由漫畫封面改製而成嘅玻璃窗!都真係幾懷念⋯
記得我最早期接觸老夫子嘅事後,本漫畫嘅紙質係好似草紙咁嘅。到後期轉咗釘裝同紙質,頭幾頁仲變咗彩色添!不過我記得連價錢都貴埋,所以慢慢就無再買喇!


門口前面已經有經曲角色,老夫子同大蕃薯嘅公仔俾大家影相!係喎⋯秦先生呢⋯

 

面嘅裝修同設計亦明顯花咗唔少心機!上至天花;下至坐椅,都加入咗老夫子入面嘅元素!牆身上嘅壁畫更加係細緻得驚人!

而近門位置就有一部「仿」車!絕對係影相位!入少少嘅位置仲有幾格浪漫嘅卡位添!


就連餐牌,佢地啲菜式名都係用四字語/成詞起名,真係會令我諗返起本漫畫!所以記得要留意埋佢地嘅餐牌!


餐廳有好多舊式茶記常見嘅野食,例如:龍爭虎鬥 ( 瑞士雞翼 )、坐享其成( 瑞士汁牛河 )、世外桃源 ( 焗豬扒飯 )等等⋯


道高一尺 $48 

秦先生玩意(菠蘿黑鑽石)
[分數:7.5/10]
言歸正傳,先嚟一杯特飲!咁多飲品之中,最有特色一定係以3位主角命名嘅飲品!道高一尺-秦先生玩意,本身係一杯菠蘿涼粉梳打,但最可愛嘅地方係加咗一大個綿花糖上去!要自己邊倒邊塞啲綿花糖落去,飲落竟然無想像中咁甜,當然亦都可以就咁食咗啲綿花糖先啦,呃like一流!

種瓜得瓜 $48 

老夫子南瓜湯 
[分數:8/10]

種瓜得瓜呢個名易估少少,就係南瓜湯喇~南瓜味幾重,而且打得多綿滑,餐湯仲會跟埋牛油餐包!軟熟嘅餐包對我嚟講真係好重要!西湯配餐包係好味過蒜蓉包好多㗎!

龍爭虎鬥 $68 

瑞士雞翼(4只)
[分數:8/10]
經典小食「瑞士雞翼」一份有4隻,每隻都好肥美飽滿~瑞士汁嘅顏色亦分布得好靚好平均!入口甜甜地唔會太鹹,醃得入味,雞翼肉質仍然嫩滑,唔錯!

坐享其成 $88

瑞士汁牛河
[分數:7.5/10]
瑞士汁牛河我都唔係好明點解叫「坐享其成」,因為基本上我地成餐都係坐享其成咁等食!河粉上面舖滿晒牛肉,真係多得有啲過份!顏色睇落都幾深,但食落口一樣唔會太鹹,不過啲河粉夾嘅時候比較易斷,始終無乾炒牛河咁多油,難免有咁嘅情況。

世外桃源 $88
焗豬扒飯
[分數:7.5/10]
焗豬扒飯嘅份量同樣十足!上面嘅芝土面焗到焦黃色,相當吸引!豬扒夠厚夠大件,自問無肉不歡嘅話就一定啱晒你!豬扒下面嘅焗飯經加蛋炒過,不過因為蕃茄汁落得重手咗,所以飯底濕咗少少。

禮尚往來 $52
特濃芝士焦糖吐司
[分數:7.5/10]
特濃芝士焦糖吐司我會當佢係半個甜品,因為多士上面加咗蒜蓉再焗,然後再加上甜甜地嘅芝士醬同焦糖醬,所以食落會鹹鹹甜甜咁。如果蒜蓉味可以淡返少少可能會更好,可能因為我自己偏愛甜味多啲~

得意忘形 $118

香橙梳乎厘
[分數:9/10]
真正嘅甜品終於出場!因為呢個甜品製作需時,想食嘅話記得係餐飲臨近尾聲嘅時候,提早15-20分鐘落單。甜品無改錯名,當佢送到嚟嘅時候,真係會令你得意忘形到唔記得要襯熱食!因為佢唔止傳嚟陣陣香味,賣相亦非常之靚~上邊仲要有埋老夫子個樣!

得意忘形 $118

香橙梳乎厘
[分數:9/10]
梳乎厘好鬆軟,因為已經加咗糖,所以更加能夠帶出蛋白香!橙味唔太重,所以完全無蓋過蛋白香!最意外係梳乎厘配嘅雲尼拿醬,雲尼拿味非常香濃,混合埋一齊食真係好香好滑!絕對係必食之選!

********************************
老夫子餐館 (太子)
太子彌敦道777-781號安寶樓1樓
*********************************
以上消費:$560
味道:8.5/10
環境:8.5/10
服務:8.5/10

衛生:8/10
抵食:8/10



沒有留言:

張貼留言