奇樂香辣雞煲 - 美酒配雞煲

早前同同事去尖沙咀做完野，幾個人諗咗好耐都唔知食咩，最後襯住天氣未算太熱，就去打下邊爐∼之前喺網上睇到附近嘅「奇樂香辣雞煲」一直喺餐廳排行榜榜上有名，同同事商量完之後大家都贊成去試下，於是我地就即刻去開餐啦~行左幾個字，終於見到奇樂雞煲～好彩唔算難搵～

餐廳環境都幾寬敞，環境舒適。我地坐低冇耐,店員就送上一盒大大盒嘅調味盒，有:芫茜、蔥粒、生蒜、炸蒜等多種配料，等我地自己配搭出最岩自己口味嘅醬料

再睇睇餐牌，發現雞煲有嘉美雞、粵皇雞及泰安雞供選擇，正當我地困惑嘅時候，店員主動過黎同我地講解有關雞種分別的知識，最後我地揀咗比較肥美嘅泰安雞，另外由於小妹唔食得辣，店員就建議我地揀微辣，非常貼心

叫完雞煲後，就開始揀其他火鍋配料，款式甚多，有牛類、其他肉類、餃/滑丸類、海鮮、小食、蔬菜、豆品及麵食類，重有2人套餐～

店員見到我地諗緊食咩嘅時候，問下我地有無興趣叫啲酒品，依加做緊優惠，叫枝酒嘅話重會另外送多3隻生蠔～因為我地唔係經常飲酒嘅關係，所以就叫店員介紹枝比較易入口同甜度高啲嘅比我地～

German Pieroth Blue Nahe $338

［評分：8/10］

 藍色嘅酒樽修長嘅樽身非常動人，記得之前都曾經飲過依款酒，店員重話依枝會比之前嘅更甜更易入口，淡黃嘅酒色，入口果味真係非常濃郁，而且好甜好易入口，令人不知不覺一杯接一杯就飲晒一枝了～

鬼馬油炸鬼

［評分：8/10］

首先上枱嘅係小食鬼馬油炸鬼，岩晒送酒～鬼馬油炸鬼其實係將墨魚滑釀入油炸鬼，油炸鬼炸得鬆脆香口，加埋彈牙嘅墨魚滑就緊吸引，而且直接食又得，放入雞煲做火鍋配料亦得，腍腍地嘅口感，吸滿濃湯，兩種食法各有特色～

泰安雞

［評分：7/10］

店員介紹泰安雞係3種雞種中最肥美的一款，除了雞件外，還有大量洋蔥、辣椒及莞茜等提味，味道蠻濃的，惹味非常，由於叫左微辣，雞煲幾乎完全食唔出辣味，絕對適合唔食得辣嘅人，不過可能因為雞種關係，肉質雖然嫩滑，但大部份雞件都好實淨

食完之後就可以加湯，加熱左之後就可開始打邊爐啦～

特級手切肥牛

［評分：7/10］

肉類我們點了特級本地肥牛同黑豚豬面頰。本地肥牛脂肪比較少，放入鍋到淥幾秒就得，肉質不算太滑膩，口感帶點韌勁，少了油香，但牛肉味較重，如果鐘意有口感嘅牛肉，就可以試下依款啦～

黑豚豬面頰

［評分：8/10］

好少係其他地方見到有豬面頰食，少有地覺得豬肉比牛肉好食，入口夠嫩夠滑，重好重豬肉味，完全無一般豬嚡口嘅感覺，面頰果然比其他部位更好食～

手打四寶丸 

［評分：6/10］
四寶，分別係鯪魚丸、墨魚丸，蝦丸同牛丸。手打丸粒粒都好飽滿，真材實料，由其係牛肉，牛肉味非常香濃，但可惜的是手打牛丸食的時候無咩口感，有啲似免治肉丸咁. . .呢樣就真係有啲美中不足了，而4款當中相對有口感嘅就係墨魚丸，味道都幾香～

黑松露帶子餃

［評分：8/10］
黑松露帶子餃皮薄餡靚，隻隻都好巨型，非常非常足料，餡入面除咗有黑松露外，重有一粒粒帶子小粒同少量木耳混合而成，因為夠晒大隻嘅關係，所以要等耐啲先食得，入口帶淡淡松露香之餘，口感重相當豐富，飽肚之選～

即炸嚮鈴

［評分：8/10］
嚮鈴即叫即炸，勁新鮮！雖然岩岩炸起，個沒有過多嘅油份，就甘拎起一條即食，又香口又鬆脆。再浸一浸湯，立即變得軟腍腍，但一樣咁香口～

唧唧墨魚面

［評分：8/10］
平時朋友仔多數最後會叫返個烏冬作結，今次就試下用唧唧墨魚面代替，由為面質較硬，所以唧出黎時有啲難。墨魚面口感比想像中好，有啲韌力，入口爽彈～又有得玩又有得食，唔錯～


奇樂香辣雞煲 (尖沙咀)
尖沙咀山林道29-31號廣利樓地下4號鋪
∼∼∼∼∼∼∼∼∼∼∼∼∼
味道：7/10
環境：7/10
服務：7/10
衛生 : 7/10
抵食 : 7/10