F1 Cafe - 去屏山賽車🏁

屏山真係一個臥虎藏龍嘅地方，先有大排長龍嘅茶座，再有特別肉餅飯！依加又俾我發現一間名車主題Cafe - F1 Cafe！坐輕鐵去到坑尾村站，向前行見到有樓梯行落去，直行入村轉右就搵到！餐廳雖然唔大，但只要見到有啲特別嘅車停泊定喺門口，再加埋大大塊跑車牌面就一定唔會錯！

餐廳地方唔算大，但內裡設計得非常有心思！所有座位都用了賽車櫈！枱嘅下方就用了車轆組成，而且每張都唔同，我嗰張係「林寶」～另一邊嘅天花板上邊仲有盞賽車比賽嘅燈添～

餐湯及牛角（連特飲） +$40 

Soup w croissant

[分數:8/10]

食物種類都幾多，有2人或4人套餐，亦可散叫。散叫可以加錢跟埋餐湯同飲品。按飲品種類劃分3種收費，普通飲品+$30、特飲+$40、酒類+$50。

是日餐湯是雜菜湯，而餐湯所配的，竟然是牛角包！暖暖的牛角包入口鬆軟，實在令我喜出望外！

小食拼盤 $98

Snack Combitation

[分數:8/10]

先來個小食拼盤，入面有炸魷魚圈、蜜糖雞翼同芝士焗薯條。全部食物都熱辣辣即叫即炸，魷魚圈唔會太韌，輕易就咬得開。蜜糖雞翼炸完再淋蜜糖，又甜又香脆。而芝士焗薯條上面嘅芝士雖然唔算好多，但就可以拉出芝士絲～令人滿足！至於兩旁嘅沙律菜，餐廳都有加咗醋汁，唔會浪費。

賽車手薄餅 $98

F1 Racer Pizza

[分數:8/10]

6款薄餅入面，我地就揀咗個名最特別嘅賽車手薄餅！原來入面係有芝士、辣肉腸、咸牛肉同火腿等等⋯真係落足料⋯除咗芝士夠多之外，因為加咗辣肉腸同咸牛肉嘅關係，令薄餅變得惹味之餘又帶有鹹香！

F1 燒牛肋骨 $188

F1 roasted beef short ribs

[分數:8.5/10]

長長嘅肋骨，睇到已經覺得非常勵害！估唔到一間隱世Cafe都會提供到咁有份量嘅美食！肋骨下面仲放滿晒薯條同蔬菜伴碟！真係份量十足！肉質方面，餐廳烹調時間控制得岩岩好，肋肉唔止有肉汁，入面仲好粉嫩添！食落去有少少口感，肉味都幾重，幾香口！咁嘅價錢認真抵食！

賓利特飲 （跟餐）

Bentley Special Drink

[分數:7.5/10]

特飲全部用跑車名命名，有法拉利、林寶、保時捷⋯幾有心思！而我就揀咗「賓利」～其實佢係一杯菠蘿梳打，入面放咗色彩繽紛嘅啫喱，食完油膩野飲返啖梳打真係舒服晒～

溫馨提示：

餐廳附近唔止有得免費泊車，仲有得睇埋名車！幫襯完搵老細買車唔知有無折呢😆

********************************

F1 Cafe (元朗)
元朗屏山坑尾村105號地舖

*********************************

以上消費：$ 467

味道：8/10
環境：8.5/10
服務：8/10
衛生：8/10
抵食：8/10